No.37/2021-2022

Aizawl, the 7th April 2021: Vawiin chawhma khan Dr Lalhriatzuali Ralte, Aizawl District Bawrhsap hovin Aizawl DC’s Conference Hall-ah kumin May 1 atanga May 8 thlenga Rajiv Gandhi Stadium, Mualpuia neih tur Sipai Lak Runpui 2021 atana inpuahchahna te sawiho a ni a. He hunah hian Col RS Dhingra, Director, Army Recruiting Office – Aizawl hnen atanga hmalakna kalmek leh thil tul dang te ngaihthlak hmasak a ni a. Hemi hnu hian Army Recruitment Rally 2021, Mizoram atana Sawrkar Department hrang hrangte, CYMA, Salem Veng YMA leh Salem Veng Local Council te mawhphurhna lak tur rel nghal a ni.

Col RS Dhingra in report a pek dan chuan kumina Army Recruitment Rally 2021, Mizoram chu Mizote pual liau liaua buatsaih tur a ni a. He Sipai Lakna a tel tum te chu joinindianarmy.nic.in ah in ziahluh(register) tur a ni. April 17, 2020 thleng khian inziahluh theih a ni a; tun thlenga inziaklut awm tawh zat chu 1500 chuang hret a ni a. He hun hi Army Recruiting Office – Aizawl chuan Mizo thalai te tana huntha a nih thu sawiin Mizo thalai tam zawk registration ti thuai tur leh tha taka lo inbuatsaih lawk turin a sawm a ni. Col RS Dhingra chuan sipai tan tum te endikna chu uluk taka kalpui tum a nih thu a sawi a. Mizo thalai hrisel pangai tan chuan Physical Fitness paltlang a harloh thu a sawi rualin tlak theihna thil – bengek fai lo, tattoo nei, etc., leh thildang dangte chu joinindianarmy.nic.in ah bihchian hmasak a that tur thu a sawi bawk a ni.

Army Recruitment Rally 2021, Mizoram huaihawtnaah hian COVID -19 hrileng laka invenhimna tura sawrkarin inkaihruaina a siam te khauh taka kalpui a ni dawn a. Sipai tan tum thalai rawn fuankhawm tur te chu fimkhurna uluk taka vawng turin chah lawk nghal a ni.

Sipai lak laia hriat tur pawimawh te chu a chunga website tarlanah hian bihchian theih a nih rualin a hnuaiah hian a tlangpui tarlan a ni.

San zawng :

160 cms – Soldier General Duty (Sipai Pangngai)

157 cms – Soldier Technical and Nursing Assistant

Rih zawng : A tlem berah 48 Kgs

Awm len zawng :77cms chin leh 5 cms ti lian thei chin

Sipai pangngai (GD) chu kum 17 ½ leh 21 inkar, Sipai Clerk/Store keeper etc chu kum 17 ½ leh 23 inkar Mizo tan pawl 8 pass chin.

Soldier Technical (Technical arms, artillery, army air defence) tang turin kum 17 ½ leh 23 inkar, 10+2 passed chin leh chunglam te tan.

Soldier Technical (Aviation & ammunition examiner) tang turin 17 ½ leh 23 inkar 10+2 passed chin leh chunglam tan

Nursing Assistant tang turin 17 ½ leh 23 inkar 10 + 2 passed chin te tan..

Education Documents:

Pawl 10 leh chunglam tan : Admit card, Board Certificate, Mark sheet

Pawl 10 leh hnuailam tan: Marksheet & TC principal signed ngei, DEO in countersigned neih tur ani.

Passport size photo color leh quality tha a ni tur ani, copy (15) sawmpanga ai a tlem lo.. Kamis hakna fiahfai tha tak ani tur a ni.

Physical Fitness Test atan a hriat tur te:

1.6 Km Run :- Sipai pangai tan chuan Min 6 (ruk) chhunga thlen hman a ngai

Pull-Up/Push-up :- Vawi 6 leh a chunglam, thei tam tam chhinchhiah an ni ang.

Zig-zag balance :- Zig zag balance kal tlang thei lo chu hnawl a ni ang.

9 Fit Ditch:- Fit 9 (kua) thui zawngin khuar zuan kan tur a ni. theihloh chuan hnawl a ni ang.

Sipai lak hi hlemhletna telloa kalpui ani a, tihpuitu emaw pawisa senga tlin tir thei tua in sawi tu lakah fimkhur turin rally a tel tum te chu hriattir nghal an ni.