Vawiin nileng khan DRDA, Serchhip leh Khawlailung MHIP Branch tangkawp hmalakna in Khawlailung Community Centre-ah CSR Project for SAGY Model Village  hmalakna  " Workshop on Women Empowerment " neih a ni a, District Bawrhsap, District Nodal Officer on SAGY ni bawk Dr. Lalrozama, IAS chuan a hmanpui a ni.

District Bawrhsap chuan hmeichhiate, a bik takin nu te pawimawzia chu sawi tam ngai lovin khawvel pumah hriat tlan vek a ni a, hmeichhiaten an chhia leh tha hriatna fim taka an hman theihna leh zah an hlawhna  apiang ram changkang leh khawtlang changkang an ni tiin hmeichhiate hmasawnna kawng hrang hrang SAGY kaltlanga ruahman ani chu thil ropui leh chhinchhiahtlak tak a ni a ti a, Serchhip District chu India ram puma ziak leh chhiar tamna ber District an nih laiin Nu nau chunga thi (MMR) leh nausen thi (IMR) ah erawh kan dinhmun a chhuanawmlo hle a, hriselna leh nunphungah pawh ziak leh chhiar thiam tamna district nen a in mawi tura kawng hrang hranga tan lak a ngai nasa hle ani tiin hmeichhiate chu an mawhphurhna a pawimawhzia hre turin a chah a ni.

Vawiin "Workshop on Women Empowerment" hi Pi Teresy Vanlalhruaii, Project Director, DRDA, Khawlailung MP Model Village Charge Officer ni bawkin kaihhruaiin, Pu K. Thangbawia, VCP Khawlailung in inlawmna thu a sawi a, Pi P.C.Lalrinawmi, President, MHIP Khawlailung pawhin SAGY kaltlanga hmeichhiate hmasawnna tura ruahmanna a taka tihhlawhtlin ani mek chu lawmawma tih thu sawiin theihtawp chhuaha hotute remruatna tawiawm an tum thu a sawi a ni.

Vawiina Women Empowerment chungchang Workshop hi hun thumah then niin, hun khatnaah "Dan hnuaia Hmeichhiate Dikna chanvo chi hrang hrang" thupuiah hmangin Pi Hmingthanpuii,Assistant Professor, G0vt. Mizoram Law College in zirtirna a pe a, hun hnihna ah "Hmeichhiate leh Hriselna" chungchang zirtirna Dr. Rita Zoramthari, Medical Officer,Serchhip District Hospital hnen atanga ngaihthlak niin hun thumnaah "Hmeichhiate leh Zirna" tih hmangin Pi Lalthlamuani, Headmistress, Chawngbuangi Memorial School, Serchhip in zirtirna a pe bawk. Vawiin hmeichhiate tihchakna tura Lok Sabha MP Model Village Khawlailunga Workshop neihah hian Khawlailung  khua Hmeichhiate thahnemtak telin, zawhna leh chhanna hun bakah sawihona hun hlawk tak an hmang ho a ni.

Vawiin programme hi Corporate Social Responsibility kaltlanga General Insurance Company, Mumbai in Khawlailung MP Model Village hmasawnna project a ruahman pakhat "Women Empowerment" hnuaia hmalakna a ni.

Attachment

  • Loading attachment...