Vawiin khan I&PR Minister Pu Lal Thanzara chuan I&PR Auditorium-ah Rita Malsawmi siam “Serial Killer” film a tlangzarh.

Minister Pu Lal Thanzara chuan Mizo hmeichhe zingah mite kai ve loh bung thar kai ngam, a senso hautakzia hre reng chunga Mizo-te talent phochhuahna leh sual dona hmanraw tangkai a nih beiseia film tha tak siamtu Pi Rita Malsawmi chhuanawm a tih thu a sawi a. Film siamtuten Mizo mipuite thinlungah ngaihhlut tur dik an ngaihhlut a, ngaihsan tur dik an ngaihsan theih nan an ngaihtuahna seng a, film tha siam zel turin a sawm a. Nitin chanchinbuah tualthihna leh ruang chhar tih te chhiar tur a awm fo ta mai chu a vanduaithlak a, Mizote hian sual sima Pathian lam kan hawi a tul a ni, Minister chuan a ti.

I&PR Director Pu Jim K.Chozah pawhin mimal hmalakna liau liau va film tha leh hautak tak siamchhuah a ni chu lawmawm a ti a. Film chu khawtlang nun siam that nan communication hmanraw chak leh awmze nei a nih avangin sawrkar pawhin a ngai pawimawh a, theihtawp chhuaha tang zel turin film siamtute a sawm a ni.

Kum 2011, September 15 atanga chin hriat loha bo ta Vanlalsiami, Aizawl North College zirlai te; May 31, 2012 a thichhawng a chhar Chaltlang Dingdi veng nula, Laldangpuii leh August 11, 2012 a bo Ruth Lalawmpuii, Ramhlun North te chungchang behchhanin Serial Killer hi siam a ni a. A ti hmuhnawm lehzual turin thawnthu anga phuah belh a ni.

Mizoram Film Development Society President Pu C.Hmingthangvunga leh Mizo Students Union President Pu PC Lalrinhlua te pawhin thu an sawi a. Anni bakah hian Vanlalsiami leh Ruth Lalawmpuii chhungten thu sawiin an fate hi hmuh leh an la beisei reng a, lo ngaihven pui turin mipuite an sawm nghal a ni.