Vawiin khan Mizoram sawrkar Science & Technology Department-a thawktute chuan Chief Scientific Officer Dr R.K. Lallianthanga Office Chamber-ah naktip March ni 9, 2016 (Nilaini) zinga ni awk lem lo awm tur chungchang sawi hona hun an hmang.

Chief Scientific Officer Dr R.K. Lallianthanga chuan heti ang van lam thil thleng pawimawhte hi hlau lo va, a nihna dik tak zir chian a, inhrilh hriat a pawimawh thu a sawi a. Tun tum ni awk lem lo awm tur hi Mizoramah chuan zingkar hun rei lo te a nih tur thu sawiin, lei leh ni inkarah thla a awm dawn avanga lo thleng tur a nih thu a sawi.

Mizoram Science Centre-a Education Assistant Pu Lalrammawia chuan ni awk lem chungchang hi Power Point Presentation hmangin a sawi fiah a. Ni awk lem chu mit lawnga en a that loh thu leh, a enna tur bika siam tarmit hman a nih loh chuan pin-hole camera emaw welder-ho hman thin tarmit hmanga en a him thu a sawi a. Roll film, X-ray film, sunglass, darthlalang rawng nei chi hrang hrang leh CD/floppy disk te pawh ni awk lem en nan a him tawk loh thu a sawi bawk.

Tun tumah hian Pacific thliarkar, Sumatra thliarkar, Indonesia leh a chhehvel rama chengte chuan ni awk lem hi a pumin an hmu thei dawn a. Mizoramah erawh chuan a puma hmuh theih a ni dawn lo va; March ni 9, 2016 (Nilaini) zing dar 5:30-ah a lem tan ang a, zing dar 5:33 atanga zing dar 6:52 thleng a hmuh theih ang.