Sawrkar Laipui in khawpuia mirethei chenna in neilo emaw mi inluah emaw te insak sakna ruahmanna thar a duan - Housing for All Mission chungchang inhrilh hre turin leh he Mission kalhmang te chiang zawka Kolasib Town Area huam chhunga Village Council- te hrilh turin vawiin khan DC Pu H. Lalengmawia, IAS hovin DC Conference Hall ah meeting neih a ni.

Pu H. Lalengmawia chuan Housing for All Mission hnuaia beneficiaries-te thlanna kawnga Village Council Member kalkhawmte chu dik takin, a dawng awm leh a mamawh ngawih ngawih te chauh thlang turin a chah a, he thilah hian chhungkhat laina leh party induhsakna te awm lo se tiin a duh thu a sawi. He Scheme thar hi a hmaa lo kalpui tawh thin ISHDP leh RAY te aiin uluk taka vilna leh endik zuina neih a ni dawn a, hma lakna mumal neilo te chu pawisa chawi tir thleng scheme hian a huam thu a sawi a.

Dr. Lalmuanpuii, Capacity Building Specialist, UD &PA chuan he Mission ina a thil tum te, beneficiaries thlanna tehfung hrang hrang leh Mission kalhmang te chu chipchiar takin a sawi a. VC Member te zawhna neih ang ang a chhang nghal bawk a. Addl. DC Pu R. Lalremsanga leh DUDO Kolasib District Pu Lalenglawma Pakhuangte te pawhin thu an sawi bawk a ni.

Housing for All Mission hi Sawrkar Laipuiin Flagship Mission niin kum 2020 thleng khawpuia mirethei tam thei ang ber chenna in sak sak chu a tum ber a ni a. He Mission hnuaia beneficiary turte chu kumkhata cheng nuai 3 aia tlem lalut, Aadhar Card nei, LSC emaw, House Pass emaw nei leh bank account nei an ni tur a ni a. Insakna tur atan hian beneficiary ten cheng 50,000 an thawh a ngai dawn a, hei hi Mission in cheng 1,50,000 in a do let ve dawn a ni. In chhe tawh repair leh sak zawmna tur a huam lova amaherawh chu he Mission kaltlang tho hian Bank Credit Linkage hnuaia cheng nuai 6 thleng a pung tlem zawkin an puk thei dawn a ni.