School Education Department leh The Mizoram Institute of Spoken English (MISE) SCERT tangkawpin Sub-Divisional Education Office, Lunglei South & Lunglei North huamchhunga Model School-te tan ‘Orientation Course for English Medium Middle & Primary Schools’ an buatsaih chu nimin khan Lunglei Government College-ah neih tan a ni a, April 29, 2016 thleng a awh ang.

Training hawnna inkhawm Lunglei North SDEO Pu R.Laldawngliana kaihhruaiah ‘Orientation Course for English Medium Schools’ chungchangah Lunglei DEO Pu Lalramthianghlima chuan Parliamentary Secretary i/c Education Pu Joseph Lalhimpuia hmalaknain zirlaibu (textbook) thar hman hnuah hetiang training buatsaih hmasak ber a nih thu a sawi a, Model School-te tana tih a nih laiin government school dangte pawhin hemi zar an zo ve ta a ni, a ti. MISE, SCERT atangin Resource person 4 rawn kalin, Govt. Electric Model P/S leh Govt. JNM Model M/S te rualin Govt. English Medium School (P/S 4, M/S 4), an vaiin school 10-a zitirtute chu training pek vek an ni dawn ta a ni.

He training-ah hian textbook thar zirtir dan, a bikin English leh Environmental Science subject-ah neihpui an ni ang a; curriculum, syllabus, CCE leh Evaluation chungchang bikte hrutpui an ni dawn.