No.3300/2021-2022

Aizawl, the 7th December, 2021: Vawiin chawhnu khan District khawpui fai inelna endiktu Team te chuan Serchhip tlawhin faina leh thianghlimna kawnga Serchhip khawpuia hmalaknate an en.

DC Meeting Hallah endiktute dawnsawnna hi neih niin Pu Lalmuansanga Ralte, MCS, Addl. DC Serchhip chuan a kaihhruaia, District khawpui fai ber ni tura an inbuatsaihna tlangpuite a sawi a. Pi Lalzikpuii, MCS, District Urban Development Officer, Serchhip chuan a lem nena entirin faina kawnga hma lak dan chipchiar a sawifiah leh a, man chawia hman theih vantlang inthiarna hmun siam anih thu te, vantlang hmuna bawlhhlawh a awm loh nan bawlhhlawh bawm tha tak dah a nih thu te sawiin, faina hnatlang a khat tawka neih reng anih thute, bawlhhlawh sawngbawl dan chungchanga hmalak dante, bawlhhlawh thliar hran kalpui dante, hmun lun lai te chu ni khatah vawi 2 phiah fai thin anih thute, plastic chhia sawngbawlna tur Plasticshredder an nei tawh thute leh hman theih thuai tura hmalak anih thu a sawi a ni.

Panel of Expert te chu Pu Ralthuama Ralte, Deputy Director (TP) UD&PA Department, Pi Casey Lalnunsangi, Scientific Assistant, MPCB leh Pu Roneihthanga, Finance Secretary, CYMA te an ni a, inkawm hona neih hnu hian Serchhip khawpui hmun hrang hrangte fangkualin, an endik nghal a ni.