UD & PA Department hnuaia ‘Mizoram Khawpui Fai Inelna - 2017’ hmachhawn turin Lunglei khawpui chu nasa takin a inbuatsaih chho mek zel a. September 6, 2017-ah Thematic Cleanliness Drive hawnga bul tanin tlawmngai pawl hrang hrang leh VC-te tangkawp kaihhruaina hnuaiah veng tinah faina hnatlang ngawrh takin  kalpui a ni a. Lunglei mipuite phur taka thawk chhuakin he inpuahchahna ah hian mi thahnem tak an hnatlang a, veng tihfai, banner siam, tuiluankawr tihfai, bawlhhlawh bawm siam hna te an thawk a ni. 

Lunglei District Sanitation Task Force chuan an Chairman Lunglei DC Pi Lalzarmawii, IAS hova ruahmanna an siam angin Lunglei khaw chhunga Village Council 24 ten an huamchhung theuhah vantlang hnathlang an ko vek tawh a. Hemi bakah hian sawrkar pisa leh zirna in ten an compound leh a chheh vel tifaiin hnathlang an nei bawk a. Lunglei khawpui hmun hrang hrangah faina kawnga inzirtirna banner-te tar chhuah niin a khat tawkin kawng dungah vantlang bawlhhlawh bawm hun a ni. 

Lunglei District Sanitation Task Force member-te team 8-ah insemdarhin 13th September, 2017 atang khan veng hrang hrang inpuahchahna a hmunah an enfiah a, hmalak tul an tih te khawtlang hruaitute an sawipui.