Vawiin chawhma khan PHE E-in-C pisaah PHE Department leh CYMA chuan tuihna humhalh leh a awmsa tih pun kawnga thawhdunna thuthlung an ziak a. PHE Department aiawhin Engineer-in-Chief Pu Lalmuanzova chuan hming ziakin CYMA aiawhin CYMA President Pu Lalbiakzuala chuan hming a ziak bawk a ni. 

PHE Engineer-in-Chief Pu Lalmuanzova chuan PHED leh CYMA ten kum 2012 a tuihna humhalh leh a awmsa tihpun kawnga thawhdunna thuthlung an ziah  chu a lo tawp tawh avangin tuna kum li dang (2017-2021) thawhdunna an ziak leh thei chu lawmawm a tih thu a sawi a. He thawhdunna hian Zoram hmun hrang hrangah rah duhawm a chhuah mek thu leh  tui hnar ram te  vat lova humhalh nachang kan hre chho zel chu lawmawm a tih thu a sawi bawk a. Hmun thenkhatah chuan YMA, VC te leh sawrkar department dangte nen thawkho in tuihnar ram mimal kuta awm tawhte pawh neih let sak lehin tuihna awm leh thei tur zawnga ram enkawl mek anih thu a sawi bawk a ni. 

He hunah hian CYMA President Pu Lalbiakzuala pawhin thu sawiin hnam ringawt humhalha ram humhalh tel si loh chu a khingbai ani a ti a. Kan tuihna neihchhunte kan humhalh loh chuan a tuartu tur chu keimahni tho kanni tiin thangtharte tana chhenfakawm ni ngei thei tura tuihna humhalh a pawimawh thu a sawi bawk a ni. 

PHED leh CYMA thawhdunna thuthlung ziah hi kum li chhung (2017-2021) atan a ni a. September 2012 khan kum 4 chhung atan thawhdunna lo ziak tawhin he thawhdunna hnuaiah hian Mizoram puma Group YMA leh Branch YMA hrang hrang ten tuihna humhalh leh a awmsa tih pun kawngah kumtin inelna neiin YMA General Conference-ah lawmman sem thin a ni. 

PHED leh CYMA te hian Swachh Bharat Mission(Gramin) hmalakna pakhat atan 2nd June 2017 khan Faina (Sanitation) kawngah thawhdunna thuthlung an lo ziak tawh bawk a. Hemi hnuaiah hian kumin CYMA General Conference atangin YMA Branch fai lawmman sem tan beisei a ni. 

Vawinna thawhdunna thuthlung ziahna hi PHE E-in-C Pu Lalmuanzova chuan a kaihruai a, PHE Department hotute leh CYMA hruaitute an tel kim hle a ni.