Vawiin khan Mizoram Sanitation Task Force hnuaia khawpui fai inelna neih mekah endiktute Panel of Expert Er. Lalrothanga SE Aizawl Circle leh Pi Mina Zoliani MIS, IPRO, Aizawl te chuan  Mamit khawpuiin faina kawnga hma an lakna kawng hrang hrangte  endikna an nei.

Heng endiktute hi District Bawrhsap Pi Lalbiaksangi hovin khawtlang hruaitute vengtin V.C te  leh tlawmngai pawl aiawh te chuan lo dawngsawngin, Anmahni pual hian  D.C Conference Hall-ah Pi Lalbiaksangi, District Bawrhsap kaihruaina-in  inkhawm tawi neih a ni a. He inkhawmah hian  endik tu lam atangin Er Lalrothanga S.E chuan thusawiin faina kan tehna a in an loh thu leh fai kan tih a in an loh thin thu a sawi a, thangthar zawkte tana faina leh thianghlimna hlutzia kan hnutchhiah chu thil pawimawh ber a nih thu a sawi. Bawlhlawh kan lakkhawm leh kan  sawngbawl danah vengfai leh fai loh thui takin awmzia a nei a, kan bawlhlawh paih danin kan veng nun zia a tarlan thin thu a sawi bawk.  Bawlhlawh bawm nalh tak tak khaia bawlhlawh paihna chang hriat loh aiin a hmanna tur dik taka kan hman a tulzia leh pawimawh zia a sawi bawk, Faina chu changkanna leh hriselna bul a ni a, faina kawnga hmalakna atana Rs 1,  chengkhat kan sen hian kan hriselna kan vawnhimna kawngah Rs 9,  chengkua hum ang kan ni a ti.

He hunah hian Endiktute chuan khawtlang hruaitute leh Tlawmngai pawl aiawhte chu zawhna zawtin an hmalakna tha tawk an tih leh tih loh an zawhna chu Khawtlang hruaitute leh Tlawmngai pawl aiawhte chuan Mamit khawpuiin faina kawnga inelna hmachhawn tura hma an lakna chu tha tawka an hriat thu leh vantlang hnatlang pawh vawi tam tak koh a nih thu an sawi a ni.

Mamit khawpui hmalakna tarlanna Pu H. Lianzela Addl D.C, Mamit  chuan neiin he faina inelna tur hian Mamit khawpui chuan theihtawpin  hma a la a, khawpui chhung vengtin V.C paruk kaltlangin vantlang hnatlangpui vawi 34 koh niin Sorkar Department , NGO hrang hrang, Bazara thil zuartute, Kohhran hrang hrang te chuan hemi pual hian an huam chhung tifaiin hnatlang an nei bawk a ni. Vengtina hmalakna endik tur hian Inspection Team pathum 3 din  ni bawkin he inelna hmachhawnna atana vantlang hnatlangpui neih hmasak ber ni 1 september ah vengtina hnatlang tur kalkhawmte atangin faina kawnga in elna atan faina thuziak Slogan hmanga in elna neih a ni bawk.

Pu H. Lianzela Addl DC chuan Mamit khawpui chu tuiluankawr felfai taka siam leh enkawl a nih avangin kumin furpui kumah pawh vanneihthlak takin leimin buaithlak tham tawh a nih loh thu a sawi bawk.

Vawiin hian endik tute leh Mamit khawpuia an mahni lo dawngsawng tute hian  Sorkar Office thenkhat, Hospital, School, vantlang inthiarna, mipui punkhawmna Hall, Bazar hmun leh infiamna hmunte an endik  a ni.

Endiktu Panel of Expert te hian vawiin vek hian Zawlnuam khawpui endik turin an pan nghal a ni.