Pu Lalrinliana Fanai, Commissioner & Secretary, Health & Family Welfare Department kaihhruaina in a office ah tunhnai khan damlo te tana Lengpui Airport-a Medical Services tuna awm mek chungchang sawiho a ni. Health & Family Welfare Department hotulute, GAD hnuaia Aviation Wing aiawh te leh Lengpui Airport enkawlna kawnga mawhphurna nei SP, Security aiawh te he meeting ah hian an tel a ni.
Damlo awm palh te tan tuna facilities awm mek hi a beitham a, chuvangin hei hi tihchangtluna, VVIP, VIP leh khualzin te, an damlo thuta an mamawh inenkawlna zualpui pe thei tur in Medical Services siam a tul thu Meeting kaihruaitu Pu Lalrinliana Fanai chuan a sawi a. Dr. John Zohmingthanga Nodal Officer atana ruat chuan tun dinhmuna damlo te tana inenkawlna an neih dan leh tih changtlun zel nana ruahmanna an siam te chu sawilangin an mamawh hrang hrangte a sawi nghal bawk . Meeting chuan Lengpui Airport a damlo enkawlna leh bawihsawm dan chungchangah Lengpui Airport Health Advisory Committee din a tul thu an sawi a, Medical services tih changtlunna tur room pakhat an pek belh theih thu Aviation Wing in an sawi nghal bawk.
Lengpui Airport hi Health & Family Welfare Department duty post a ni lo chungin a theih ang angin Department hian Lengpui PHC a Doctor leh nurse te chu an duty tir thin a chuvangin he duty post atan Post siam chu DP &AR lamah bawhzui nise an ti a. Chhiatna leh chetsualna a thlen thulha Lengpui PHC chu First Referral Centre atan hman nise tiin hemi atan hian PHC tihchangtlun dan pawh an sawi nghal a ni. He thilah hian GAD, H&FW, Home leh DP&AR Department te chu thawhho a tul thu sawi a ni bawk.
Lengpui Airport ah hian venhimna hna thawkte tiamin thawktu 334 vel an awm a, nitin khualzin lut leh chhuak 700 bawr vel an awm a. Lengpui Airport atan hian a hranpa in Medical Officer leh staff ruahman a la awm lova, Lengpui PHC a thawk ten an la hmui hrih a. Room pakhat allot niin khum 2 a awm a, equipment lam pawh an nei em em lo a ni.
