Mizoram State  Sanitation Task Force hnuaia khawpui fai thlan tur atana inbuatsaihna kal zel-ah Mamit khawpui chuan beihpui a thlak chho mek zel a, tukin khan Pi Lalbiaksangi District Bawrhsap leh Department hrang hrang hotute chuan veng hrang hranga hmalaknate a hmunah an enfiah a ni.

Tarlan tawh angin Khawpui fai thlanna turah Mamit khawpui thlan a nih ve ngei theihna tur hian kawng hrang hrangin hmalak chhoh mek a ni a. Village council hrang hrangte chuan an huam chhung theuhah vantlang hnatlang huaihawtin hmalak a lo ni tawh a, chhungtin, kohhran leh NGO hrang hrangte chuan hma an lo chho mek zel a  ni.

Tukina veng hrang hrang endik tur hian team hrang hrang insiam a ni a,  veng hrang hrang te'n hma an lo lak:tawhna chu lawmawm an tih rualin duhkhawp loh deuh lai leh hmalakna tur la awm te chu , vengtin VC te hrilhhriat nghal an ni a,  hmalakna tur la awm ang angah theihtawp a tihfai hna lo thawh leh an tum thu leh a tul dan anga vantlang hnatlang pawh koh nawn leh tum a nih thu endiktute hi an lo hrilh a ni.

Khawpui fai thlanna hmachhawn tura Mamit khawpuiin khawtlang huapa hma a lak lai hian Census Town Zawlnuam khawpuiah pawh khawtlang hruaitute leh tlawmngai pawl hrang hrang hmalakna in hmalak chhoh mek a ni bawk.