Vawiin chawhma khan Mizoram Polytechnic, Lunglei Hrangchalkawn chuan MPL Multipurpose Hall-ah Freshers’ Social hun an hmang a, Pu PC Lalthanliana, Social Welfare Minister chuan khuallian niin a hmanpui.

Pu PC Lalthanliana chuan “Helai zirna hmunah tunge I nih tih hian I dam chhungin tunge I nih tih a hrilhfiah dawn a ni” tiin zirlai kalkhawmte chu an nun kawnga hun pawimawh tak an zawh chhoh mek avangin an hun hmang tangkai turin a chah a. Hlawhtling tur chuan rilru chhel tak put a tul a ni tiin Minister chuan zirlai nih laia nuamsa taka lehkha zir hi hlawhtlinna a ni lo a, harsatna phenah hlawhtlinna a awm zawk, chhelna phenah malsawmna a awm zawk tiin zirlaite chu a eng zawnga thil thlir thin turin a fuih a. Zirlaite tan tumruhna tak tak leh hlawhtlin duh tak tak na rilru neih a pawimawh thu sawiin Minister chuan zirlai kalkhawmte chu tum mumal tak nei a, ram leh khawtlang tana mi chhawr tlak ni tura tan la turin a fuih bawk. An zir laite hriatthiam tum tak tak na rilru nen lehkha an zir chuan nakin hun lo awm zel turah an thiamna te hmang tangkaiin, sawrkar department hrang hrang bakah private company-ah te pawh hna sang tak tak an la chelh chho thei dawn a ni, a ti bawk.

Vawiin Mizoram Polytechnic, Lunglei Freshers Social programme hi R. Lalrintluanga, Vice President, MPSU-in a kaihruai a, MSU, MZP leh NSUI hotute pawh an tel a ni.

Mizoram Polytechnic, Lunglei hi kum 1981-ah din niin tun dinhmunah zirlai 251 an awm a (mipa – 210, hmechhia - 41), staff 73 an awm a ni. He zirna in ah hian Mechanical Engineering, Civil Engineering, Electrical Engineering leh Computer Science Engineering course a awm bakah skill development lamah pawh zirtirna pek niin Community Development through Polytechnic leh Community College Scheme hnuaiah te thiam thil inzirtirna training buatsaih thin a ni bawk.