India rampuma khawpui fai inelna “Swachh Survekshan 2018” atan hmalak dan tur te inhrilhriatna hun “Sensitization Workshop on Swachh Survekshan 2018” chu UD&PA Department buatsaihin vawiin khan NLUP Conference Hall-ah neih a ni a, Pu Zodintluanga, Minister UD&PA in a hmanpui.
He worshop Pu Joseph H.Lalramsanga kaihhruaiah hian Minister Pu Zodintluanga chuan khua a lo thang lian a, mipui an lo pung zel a, khawpui mamawh lo sang zel karah khawpuia chengten nunphung pangngai an neih theih nan UD&PA hian a theihna apiangah mipui tan hma a la thin a, a chang chuan mi harsa zawkte tana in sak hna te kalpuiin, thiamthil chherchhuah nan skill development te, hamsawnna ruhrel dinna kawngah te leh khawpui huam chhunga tualchhung sorkar inrelbawlna kawngah pawh nasa takin hma a la a ni a ti. Minister chuan Ministry of Housing & Urban Affairs in khawpui a lo fai zawk nan ‘Swachh Survekshan 2016’ lo ruahman tawh a, hetah hian India rama khawpui 73 inelin, Aizawl khawpui chu 41-na a ni a. Kum 2017-ah khawpui 500 (Amrut Cities ho zingah) inelnaah 105-na a lo ni tawh bawk a. Swachh Survekshan 2018 hi buatsaih chhoh leh mek a ni a,hetah hian khawpui 4041 kan inel dawn a ni a ti a. Hei hi India ramah Mizoram hi State fai berte zinga mi a nihzia pholanna remchang a ni a, hemi atan hian UD&PA Department pawhin theihtawpa hmalak a tul a ni tih hriain District Administration lama hotute nena hnathawh dan tur sawihona hun hi a buatsaih ta a ni a ti a. Tuna kan inbuatsaih chhoh mek Swachh Survekshan 2018 pawh hi January – February, 2018 chhung hian Sorkar laipui atang endiktuten an rawn en leh dawn a ni a ti. Ministry of Housing & Urban Affairs in Swachh Survekshan 2018 kalpui nan leh kalpui dan tur Toolkit a siam zulzuiin, Mizoram chhunga Swachh Survekshan kalpui dan tur ruahhmanna Swachh Survekshan Roadmap buatsaih a ni a ti. Minister chuan Mizoram chu India ram pumpuiah faina kawnga hmahruaitu niin thang kan chhuah thei a, Swachh Survekshan 2018 atan hian mawhphurhna kan nei theuh ani tih hriain, pheikhai rual taka ke kan pen chuan kan tum hi kan hlenchhuak ngei ang tih ka ring tlat a ni a ti.
Vawiin workshop-ah hian Dr.C.VanLalramsanga, Secretary, UD&PA Department chuan Swachh Survekshan 2018 sawihawnna neiin, State Level a khawpui fai ber ni mai duhtawklova, National Level leh khawvel pum huap pawha langpha ni tura hmalak a pawimawh thu a sawi a. Bawlhhlawh hmang tangkai in hydrocarbon siam nana hmandan tur ruahmanna pawh siam a nih thu sawiin, hemi atan hian bawlhhlawh thliarhran kan zir a tul thu a sawi a ni. Vawiin workshop-ah hian Swachh Survekshan 2018 atana hmalak dan tur hrang hrang te sawiho a ni. Hei bakah hian Aizawl Municipal huamchhunga khawlaia bawlhhlawh paih te chunga hmalak dan tur ruahmanna siamte tarlan a ni bawk.
