Vawiin chawhma dar 11 khan DC Conference Hall, Keifangtlangah Champhai District Level Committee on PMGDISHA chu an Chairman Champhai DC Pu Vanlalngaihsaka, IAS hovin an thukhawm. 

Thutkhawmah hian Champhai District hnuaia block hrang hrang aiawha lokalte hnen atangin an hmalak tawhna leh kal zel dan turte ngaihthlakna leh hrilhhriatna neih a ni a. Chairman chuan PMGDISHA chu chak zawka hmalak aniha target-te tlin ngei a nih theih nana tan la zel turin member-te chu a chah a. Hemi tur hian Block lama mawhphurtute chu inpuahchahna tha tak neia agency-te nena thawkho zel turin a chah nghal bawk a ni. 

Meeting-in a tarlan dan chuan tun dinhmunah Champhai District chhungah hemi Programme kalpuina tur hian Training Centre pali - Farkawn, N. Khawbung, Kawlkulh leh Dulte-ah te din a ni tawh a. Zirlai inziaklut zawng zawng hi 661 niin Course zir zo tawh mi 661 an awm a, heng zinga mi 204-te chuan Certificate an dawng tawh a ni. Training Course zirna tur hmun hma thlan kawngah Darwin Society-in hma an la mek zela, anni hi Training partner an ni bawk a. Champhai District-ah hian March ni 31, 2019 ral hma ngeia mi 4,500 te hnena digital khawl hmang thiam thei tura zirtirna pek hman tuma ruahmanna siam a ni.  

Khawvela Digital Literacy Programme lian ber ni tura ruahman PMGDISHA hi Digital India Programme, Ministry of Electronics & Information Technology hnuaia mi niin February, 2017 khan Union Cabinet Meeting-in a pawm a. Hemi Project atan hian sum cheng vaibelchhe 2,351.38 dah a ni a. India ram puma thingtlang hmun kilkhawra awm te tana nitin nun alo zangkhai zawk theih nana  internet, computer leh smart phone te hmang thiam thei tura zirtirna (Digital Literacy)  a ni a. District chhung hmun hrang hrangah Training Centre dina zirtirna pek tur a ni a. Zir man a awm lova, zir thei turte chu thingtlang/zokhua (Rural area) a cheng kum 14-60 inkar internet, computer leh smart phone kaihhnawiha thiamna neilo, chhungkaw 1 atangin mi 1 zel tan a ni a. He programme hnuaia zir tur hian  SC,ST,BPL, hmeithai, vohbik (rualbanlo), college drop out leh hetiang lama thiamna neilo zirlai naupang pawl 9-12 te chu duhsak bik an ni. 

PMGDISHA-in a tum ber chu Technology khawvela nitin nun alo awlsam zawk nana a thiamlote zirtirna pek a ni a. Entirnan: Smart phone leh internet kaltlanga tui, electric bill pek, pawisa inthawn, topup thun, thil lei (online payment), email thawn leh adangte a ni a. Hetianga pawisa fai telloa mamawh chi hrang hrang lei/lakluh/bill pek etc (Cashless Transaction) thiamna hi chhungtin atangin mi pakhat talin an thiam chuan chhungkaw nun awlsam zawk nan kawngro a su thui dawn hle a ni. Sawrkar laipui chuan he hmalakna hnuaiah hian thingtlanga cheng mi  vaibelchhe 6 (6 Crore) chu March 31, 2019 hma in zirtirna pek hman a tuma; hei hi thingtlanga cheng mi za zela 40 vel a ni a. Mizoram bikah chuan mi 38,000 hnenah zirtirna pek tur niin, Champhai District-ah chuan mi 4,500 hnena ziritrna hi pek tura duan a ni.