District Institute of Education and Training (DIET), Aizawl chuan vawiin khan anmahni DIET Auditorium, Chaltlang ah Annual Function an hmang a, Education Minister Pu H.Rohluna leh Parliamentary Secretary Pu Joseph Lalhimpuia ten an hmanpui.
Khuallian Minister Pu H.Rohluna chuan thusawiin zirna tihhmasawnna tura pawimawh ber te chu zirtirtu an ni, a ti a. Chutianga zirtirtu te training neihpui thintu DIET chu an pawimawhin an mawhphurhna pawh a sang hle a ni, a ti. Zirtirtu tling leh tha an nih theih nan training-a an zir te chu thahnemngai taka an thawhna school theuhvah bawhzui turin training hmang mek kalkhawm te chu a chah a. ‘A tak taka hlenchhuaktu zirtirtu ten an kenkawh that loh chuan engtikah mah zirna tha (quality education) kan nei thei lo vang,’ a ti bawk. Tuna kan dinhmun atangin engtin nge zirna a tha thei ang bera kan kalpui theih ang tih ngun taka ngaihtuahna te senga, ram leh hnam tana chhawrtlak mi puitling chherchhuah an nih theih nan thahnemngai taka tan la zel turin a chah bawk. Zirna siamtha turin tanrual a ngai tiin Minister chuan mahni mawhphurhna zawn theuhvah theihtawp chhuah turin a ngen bawk a. Khawtlang buaipui ngai zirtirtu ni lo tura chahin, zirlaite leh khawtlanga mi entawntlak ni theuh turin a ngen bawk. Tunlai khawvel hmasawn zel man pha tur leh zirlai naupang te kawng dika kaihruai thiam zel turin zirtirtu te chu a fuih bawk a ni.
Khualzahawm Parliamentary Secretary Pu Joseph Lalhimpuia chuan zirna tihhmasawn nana Sawrkarin kawng hrang hranga hma a lak dan tlangpui te a tarlang a. Zirtirtu tha leh tling chauh lak an nih theih nan zirtirtu lak pawh MPSC kutah dah a nih thu a sawi a, tha zawka zirna kalpui a nih theih nan district hrang hrang DIET ah zirtirtu te training neihpui an nih thu te a sawifiah bawk. School thenkhatah zirtirtu, mahni tha, hun leh sum senga thahnemngai taka hma la mek an awm chu ropui a tih laiin zirtirtu thawk tha peih lo leh zawmthaw tak awm thin chu a tul anga an chungah action lak zel a nih tur thu a sawi lang bawk.
Minister hian DIET leh NIELIT tangkawpa siam Computer Laboratory leh National Mission for Education (NME-ICT) Project hnuaia BBoVPN Internet connection te hawngin Refresher Course in Hindi a khar nghal bawk a, Parliamentary Secretary Pu Joseph Lalhimpuia chuan Annual Magazine 2014-2016 a tlangzarh bawk a ni.
DIET Annual Function hi SCERT Director Pi Malsawmthangi’n a kaihruai a, DIET Principal Pu Lalnuntluanga Hnamte, NIELIT Director Pu N.B.Singh leh Prof. Pramod Rawat, Central Institute of Hindi (CIH), Agra ten thusawina hun an hmang bawk. DIET hi kum 1953 ah din a ni a, mi 6,046 hnenah training an pe tawh a, tunah hian Primary School, Middle School zirtirtu leh Pre Service mi 360 ten training an nei mek bawk a ni.
