Chief Minister Pu Lal Thanhawla chuan ‘khawtlang nun siam tha turin mahni inbihchiana, insiam that hmasak a tul’ a ti. He thu hi vawiina I&PR department leh Central YMA tangkawp ina buatsaih ‘ Khawtlang Nun Siam That’ tih thupui hmanga workshop Lal Thanhawla Auditoriuma neiha a sawi a ni. Workshop theme ah ‘I Ram leh Hnam Chhan Turin Rawn Pen Chhuak Rawh’ tih chu thlan a ni.

Chief Minister chuan hetiang workshop buatsaih a ni chu thil pawimawh tak a ni a, a hun hle bawk a ni tiin, a buatsaihtute chungah lawmthu a sawi a. Khawtlang nun siam thatna kawngah mahni atanga bul tan angai a, chuvangin rinawmna, dikna leh takna kan neih a tul a ti a. Ram leh hnam humhalh tur pawhin mahni inhumhalh hmasak a tul a, chumi tur chuan hriselna tha kan neih hmasak angai a, chuvangin kan hriselna tichhe theitu lakah kan fihlim a angai a ni a ti. Pu Hawla chuan ringtu kan nihna hi rim taka kan hman chuan khawtlang siam thatna kawngah pawh chak takin kan kal thei a ni a ti a. Chief Minister chuan YMA, Kohhran leh sorkar chu rualkhai takin kan kal thin a, hei hi Mizote vanneihna pawimawh tak pakhat a ni a ti.

Thuhma sawitu Pi Lalnithangi, JT Director, I&PR chuan he workshop buatsaih tur hian Central YMA nen inpawhtaka an sawiho thin thu a sawi a. Chief Minister, I&PR Minister leh Finance and Planning Minister te pawhin tha an tih thu sawilang bawkin, Pathian kaihhruainaa kan khawtlang nun siam tha tura a bul kan tan thei hi a lawmawm hle a ni a ti.

Thusawitu dang Pu Lalbiakzuala, President, CYMA chuan engtinge kan khawtlang harsatnate kan sutkian theih ang tih hi sawiho a tul avanga he thupui awmkhauh tak hmang hian workshop hi buatsaih a ni a ti a.Ram leh Hnam humhalh tihah pawh khawtlang nun siam that hi a bulpui a ni a ti a. Kan pipute hun laia ‘sem sem dam dam, ei bil thi thi’ an tih thin te kha tunlai nunah chuan hriat leh hmuh tur a awm tawhlo tih sawiin, IT khawvel chak tak hnuaiah khawsain, siam that ngai tam tak alo piang ta a ni a ti a. YMA in kan siam that loh chuan tumahin an siam tha lo ang a ti a. Chuvangin khua leh tui tha kan nih chuan mawhphurhna kan nei vek tih inhria a, thil thalo kan hriat leh hmuhte hi en liam mai mai loin, pawnlang chauh nilo a chhungril atangin siam that hna thawkin, mimal leh chhungkua atangin bul i tan ang u a ti.

Khualzahawm Dr.C.Vanlalramsanga, Secretary, Planning chuan ram ralmuang tha em em kan neih laia khawtlang nun siam that ngai awm hi engtizia nge ni ta tih chu ka inzawhna a ni a ti a. Khawvel ramdang leh India hmun dangte ngaituah chuan keini tluka khawtlang nun nei tha hi an awm bika a hriat loh thu a sawi a. Kan thil tih leh hnathawhah te mitinin dik taka thawh hi kan bat a ni tih kan hriat a tha tiin, mipuite kan ngaih pawimawh hmasak a tul a ni a ti a. Kan hnathawhah harsatna sukiang zawnga thawkin, kan hnathawh chhan chu mipuite hmathatna tur a ni tih hre reng chung a mipuite hi chanchin (history) siamtu kan ni tih kan hriat a tul tih a sawi a. Kan hmazawn theuhah rim taka hna thawk tur kan ni tih i in hre thar ang u a ti a ni.

Workshopa tel tur hian Mizoram pum YMA Branch zawng zawng, sub hqrs kaltlanga sawm an ni a, Workshop chhimtu zawng zawngte hi mi 1000 chuang an ni a,  YMA palai bik tel zawng zawng hi mi 978 an ni a, auditorium-ah hian an lenglo hle a ni.

Workshop session hmasa hi Pu J.Lalsailova, Treasurer, CYMA in a kaihruai a, chawhnu lamah session hnihna neih chhunzawm a ni.