Vawiin khan Planning Department Conference Room-ah vansang lam thiamna hmanga hmasawnna hna hrang hrang huam zau zawka ruahmanna (Space-based Information Support for Decentralised Planning - SISDP) chungchanga inkaihhruaina leh inzirtirna hun, Mizoram Remote Sensing Application Centre (MIRSAC) in an hmang a. He hunah hian sorkar Department hrang hrang aiawh mi thahnem tak an tel.

He inkhawm hi Pu Saihlira, Principal Adviser-cum-Additional Secretary, Planning & Programme Implementation Department-in a kaihruai a. Thusawiin Pu Saihlira chuan, hmasawnna tluantling nei turin ruahmanna tha a ngai a, ruahmanna tha nei turin scientific data a pawimawh a. Mizoram Remote Sensing Application Centre (MIRSAC) in vansang lam thiamna hmanga data tha min han chhawpchhuak thei hi a lawmawm hle a, hmasawnna hna thawktu department ten tangkai taka an hman a beisei thu a sawi.

Dr Lalnunsiama Colney, Principal Scientist, MIRSAC chuan thuhma sawiin Indian Space Research Organization (ISRO), Department of Space chuan SIS-DP project kalpui dan tur leh a senso thlenga an rawn tum thu a sawi a. Kum 2010 atang khan MIRSAC chuan he project hi a thawk tan a, tunah hian peihfel thawkhat a ni tawh a, Data te hi Internet- Bhuvan portal-ah dah a ni dawn a, heng data te hi department te bakah mipui mimir thlengin hman theih a ni dawn a ni, a ti a. Ruahmanna huam zau zawk (Decentralised Planning) hmanga hmasawnna hna kalpui hi Sorkar laipui chuan 73rd Constitutional Amendment - 11th Schedule (Article - 23G) hmangin ruahmanna a siam a. Hei hian a tum ber pakhat chu vansang lam thiamna chhawr tangkaia ram hmasawnna tura ruahmanna a bulthut atanga siam a ni a. Hetah hian sorkar department mai bakah mipui mimir thleng pawhin he ruahmanna thar siamah hian chanvo an nei thei dawn a. He scheme hian sum leh pai senso tlem zawk, langtlang leh awlsam zawk bawk si a ruahmanna siam tur a nih avangin hmasawnna rualkhai zawk thlen theihna tur pawimawh tak a nih thu a sawi bawk.

Pi Hmingthanpuii, Senior Scientist, MIRSAC chuan Mizoram chhunga he scheme atana data hrang hrang siamte a lem nena entirin a sawifiah a. Mizoram chhunga lui luan dan, ram hman dan leh ramngaw khuh chin leh a ram awih dan bakah khaw hrang hrang leh inkalpawhna kawng te entirin a sawifiah a. Heng data hrang hrang te hi satellite thlalak fiah leh lian zawk (Cartosat & LISS-IV) atanga chipchiar taka zirchian a nih thu a sawi bawk. Sorkar department mai bakah mipui mimirin heng data hrang hrang te hi awlsam taka an hmuh leh an neih theihna turin a bul tumtu, ISRO, Department of Space chuan internet-ah a dahchhuak dawn a ni. He a dahna hmun Bhuvan Portal chungchanga hriat tur hrang hrang te hi Pu C. Vanlalengkima, Scientist, MIRSAC chuan kalkhawmte a hrilhfiah bawk a ni.

He inkhawmah hian zawhfiah ngaite inhrilhfiahin sawihona hun hman a ni a. Kharna thu sawiin Pu Z.D. Laltanpuia, Scientist, MIRSAC chuan SIS-DP data hi a hman tlak hle dawn a, a scale hi a len avangin ruahmanna tha siam nan a tangkai hle dawn a ni, a ti. He inkhawmah hian department hrang hrang aiawhte leh MIRSAC Scientist thahnem tak an tel a ni.