Vawiin khan Secunderabad-a hmunpui nei, National Institute for Mentally Handicapped leh Social Welfare Department-te chuan Chanmari YMA Hall-ah rilru lama rualbanlotetan zirna hmanraw chi hrang hrang an sem a. Health and Family Welfare Minister Pu Lal Thanzara chuan khuallian niin he hun hi a hmanpui a ni.

Khuallian, H&FW Minister Pu Lal Thanzara chuan rilru lama rualbanlote'n tunlai thiamna hmanga siam, zirna hmanraw tha tak, a thlawna an dawng thei tur chu lawmawm a tih thu a sawi a. Rualbanlo ni a kan hriatte pawh khawvel hriata mi fing ber ber an awm thu leh mitvarte khawvel hmuh aia fiaha mitdelten khawvel an thlir a, hla thu mawi taka an puanchhuah theih thu sawiin Khuallian chuan, rualbanlo enkawltu kalkhawmte chu hmangaihna nen tihtakzeta enkawl turin a fuih a. Minister chuan Mizoramin rualbanlote enkawl kawnga hmalatu pawl hrang hrang leh mimal chhuanawm tak tak a neih laia rualbanlote hamthat nana hmang duh, mi rinawmlo an lo awm leh zeuh thin chu pawi a tih thu a sawi bawk. Khuallian Pu Lal Thanzara chuan rilru lama rualbanlote hnenah zirna hmanrua chi hrang hrang a sem nghal a ni.

He inkhawm hi Social Welfare Department Secretary Pu Lalthangpuia Sailo chuan a kaihruai a. National Institute for Mentally Handicapped aiawhin Special Education & Controller of Examination-a Lecturer, Pi Nibedita Patnaik chuan thu tawi sawiin an hmanraw sem turte a sawifiah a. Zirna hmanrua an sem turte chu Teaching & Learning Material kit za leh sawmnga (150) leh a rilru lama rualbanlote hman tangkai theih tura duan sa Laptop sawmhnih (20) a nih thu leh, zirna hmanruate chu naupangte kum mil zela mithiamten an siam a nih thu a tarlang bawk. Social Welfare Department Director Pi Vanlaldini pawhin thu sawiin rilru lama rualbanlo leh a enkawltute chu an zirna hmanraw dawnte hmang tangkai turin a chah a ni.

Rilru lama rualbanlote zirna hmawraw sem inkhawm hi Social Welfare Department Assistant Director Pi Chuauzipuii chuan lawmthu sawiin a khar a ni.