1416/2022-2023

Aizawl,29th July 2022: Vawiin khan School Education Minister Pu Lalchhandama Ralte chuan a office chamber-ah Mizo Grammar Society buatsaih ‘Mizo Tawng Ziah Dan Dik’ tih lehkhabu a tlangzarh. 

Minister chuan lehkhabu  tlangzarhnaah thu sawiin khawvel hriata Mizo tawng pholan a nih theih nan sorkarin hma a la zel a, Mizo tawng tihmasawn  te, hnam inpumkhatna tura Mizo tawng pawimawhna te hriain a tihhausaka tih lar hi hnam anga ram lak nan a tul tih sorkarin a hria a ni a ti.

School Education Minister chuan SED Board 14 din a lo nih khan HRD pawh din a ni a, he Board hnathawh tur zingah hian Chief Minister-in Mizo tawng humhalh leh  tihhausakna tur atana hmalak hi a sawi tel a ni a ti a. Chumi bawhzuina kal zelah chuan Mizo Language Board (MLB) din a lo ni ta a, MLB chu Gazzette-a chhuah a nih hnuah Law Depatment pawmpui turin thehluh a ni tawh a ti a. MLB Office tur pawh tihfel a ni tawh a, MYC Office hlui chu an luah dawn tih sawiin Chairman leh Secretary turte pawh hun rei loteah tihfel a ni dawn a ni a ti.

Minister chuan Social media-ah Mizo tawng hman dan dik lo a tam a, thangtharte zingah ziah dan dik hre lo an tam tawh hle tih sawiin Mizo Grammar Society-ten ziah dan dik hriatna tur lehkhabu an chhuah chu lawmawm a tih thu a sawi. Minister chuan Mizo tawng ziah leh hman danah tun hmain thuneitu mumal an awm lo tih sawiin tun hnaiah sorkarin School Education Department chu thuneihna a pe a ni a ti bawk.

Mizo Grammar Society hruaitute chuan an lehkhabu chhuah chu Mizo tawng ziah zawm leh zawm loh tarlanna a ni a, dictionary anga hman tur a ni  tih an sawi a, Grammar behchhana ziah a nih avangin an lehkhabua an tarlan te chu inhnialna a lo awm a nih pawhin sawihona neihpui an in peih reng tih an sawi a ni.

Lehkhabu tlangzarhna inkhawm hi Pu Lallawmzuala, President, Mizo Grammar Society-in a kaihruai a, he society hruaitu thenkhatte leh sawm bik mi thenkhatte an kalkhawm a ni.