United Nations in khawvel pum huapa damdawi hmansual leh tawlhruk dona ni 1987 atanga a hman tan chu vawiin khan Mizoram pawhin a vawi 8-na atan I & PR Auditorium-ah neih a ni a. Social Welfare Minister Pu P.C. Lalthanliana chuan he hun hi khuallian chan changin a hmanpui a ni

 

 

Vawiina he ni pual inkhawm hi Social Welfare Secretary Pi B. Sairengpuiin a kaihruai a. Inkhawm buatsaihtu department hrang hrang hotute an tel kim hle. Kumina he ni thupui chu 2007 atanga hman tawh thupui bawk - ‘Ruihhlo in a khuahkhirh che em? I nun leh khawtlangah ruihhlo in hmun a chang lo’ tih a ni. Social Welfare Minister chuan khawvel pum huapa he ni pawimawh tak Mizoram-in a hman ve a ngai chu pawi a tih zawk thu sawiin, he ruihhlo tawlhruk leh hmansual do ngai ve lo state leh he ni pawh urhsun taka hmang ve ngai lo state nih a chak zia  a sawi a. Amaherawh chu ruihhlo chuan ramri kham a neih loh avangin Mizoram pawh a kangkai a, chuvangin huamzau taka heng damdawi hmansual leh tawlhruk hi kan do tlan a ngai a ni, a ti. Minister chuan ruihhlo reng reng do rem a huphurhawm zia sawiin sorkar leh pawl hrang hrang chakna ngawta do zawh a ni lovang a ti a. Chuvangin rilru leh thinlung lamah kan kristianna nen, Pathian thu hmang chauha hneh theih a nih avangin Kohhran te pawhin tun aia nasa zawk hian tanla se a duh thu a sawi a. Kum 1997 atanga ruihhlo ngawlveite enkawlna hmun Sethawn De-addiction Centre chu tuaithar leh a nih tur thu sawiin hemi atan hian Chief Minister kaihhruai Board din a ni a ti. Social Welfare Minister chuan Zonun zemawi dinthar leh tura pawl leh kohhran thalai ten hma an la chu fakin hengte pawh hi ruihhlo do na kawng tangkai tak an ni a ti.

Social Welfare Minister hian ruihhlo do kawnga sulsutu hmasa leh vawiin ni thlenga hetiang kawnga la in hmang mi 12 te hnenah chawimawina certificate a hlan a. Chungte chu : C. Thansiama, Saizama Sailo, Vanlalruata Ralte, C. Dozuala, Lallianmawia, Dr. Sangthankima Sailo, Sister Rose Paite, Dr. R.L. Sanghluna, Dr. C. Lalhmingliana, Zothanpuii, Hrangthanmawii leh Lalriliani te an ni.

Vawiin inkhawmah hian Excise Commissioner Pu Lalbiakmawia Khiangte chuan ruihhlo chi hrang hrang khuahkhirhna tura Mizoram sorkar-in dan leh hrai a hman mekte a tarlang a. Hengte hi Mizoram mila ennawna siamthat an tul dante a sawi.

Thusawitu dang MSACS Project Director Dr. K. Ropari pawhin ruihhlo in a chim buai mi tam tak HIV/AIDS hrik pai an awm avangin hemi kawngah hian tha thlah lova tanlak puiah mipui a sawm nawn leh a ni. Social Welfare Director Pu Vanchungnunga pawhin thu tawite sawiin ruihhlo do kawnga hman tangkai tur video CD a tlangzarh a ni.

Social Welfare Deptt., MSACS, UNODC, Excise & Narcotics, Health & Family Welfare, Mizoram Police, IG Prison, School Education, Mizoram Home Guards leh MSD & RB tang ho buatsaih inkhawmah hian ruihhlo avanga nunna chante sunna hun leh ruihhlo do kawnga theih tawp chhuah tura thutiam hun te hman a ni bawk.