No.3003/2021-2022

Aizawl, 16th November, 2021 : Kar khat awh tur “International Workshop-cum-Conference on Mathematics Education” chu nizan zan dar 6:00 PM khan hawn a ni a. Hawnna inkhawmah hian Mizoram University Vice Chancellor Prof KRS Sambasiva Rao chu khuallian niin, Dr R.P Munoz, Rector, University of Guadalaraja, Mexico leh Dr Lalzirmawia Chhangte IAS, Secretary, School Education, Mizoram te chu khual zahawm an ni a, He programme hi Human Resources Development Board, Govt. of Mizoram leh Mizoram Mathematics Society (MMS) ten an sponsor a ni.

He programme hawnna inkhawm kaihruaitu Mizoram University Mathematics Department Professor Jamal Hussain chuan programme neih a nih chhante sawiin inlawmna thu a sawi a. Mathematics hlauhna leh tui lohna hi Mizoram chauh ni lovin khawvel pum huapa ram hrang hrangte nena harsatna kan tawh tlan a nih avangin hetianga khawvel hmun hrang hranga mithiamte nena hun hman ho hi Mizoram University chuan tul a tih vanga buatsaih an nih thu a sawi a ni.

He huna khuallian MZU Vice Chancellor Prof KRS Sambasiva Rao chuan zirlai leh zirtirtute mamawh em em leh khawvel pum huapa harsatna kan tawh tlan, mumal taka hmachhawn ho dan tur MZU Mathematics department leh University of Guadalajara, Mexico tangkawp ten ngaihtuah ho a, programme tha tak an buatsaih chu lawmawm a tih thu a sawi a. Ram hmasawn nan Mathematics hi a pawimawh avangin a zirna leh zirtirna kawngah pawh hma thar la a, tan kan lak zel a ngai a ni a ti.

Khual zahawm Dr Lalzirmawia Chhangte IAS chuan hetianga programme tha tak buatsaih a ni chu lawmawm a tih thu sawiin amah ngei pawh pawl sawm a zir laia Mathematics-a harsatna tawktu a nih thu a sawi a. Tun thlenga Mizoram zirlaite harsatna a nih avangin Education department pawhin theihtawp a chhuah thin thu a sawi a, he programme hian rah tha a chhuah ngei a beisei tih a sawi a ni.

Hawnna inkhawmah hian Prof Berinderjeet Kaut, Singapore te, Prof Zsolt Lavicza, Austria te, Dr GC Dominguez, USA Prof S. Borkotokey, Dibgugarh University te, Prof Diwakar Tiwari, Dean, MZU ten Key note address neiin MZU Department of Mathematics and Computer Science Dr J.P. Singh chuan lawmthu sawina hun hmangin hawnna hun hi a khar a. NIE, Singapore, Columbia University leh Johannes Kepler University Linz atanga mithiam ten topic hrang hrangah presentation an nei chhunzawm nghal a ni.

He programme hian tunkar zirtawpni (November ni 19, 2021) thleng a awh ang a, he hun chhung hian zan tin mithiam hrang hrangin topic hrang hrang an sawi thin ang. HRD Board Vice Chairman Pu L.Thangmawia pawhin November ni 19, 2021 zanah Mizorama Mathematics zirna lo than chhohdan chungchangah presentation a nei dawn a ni.