No.3004/2021-2022

Aizawl, 16th November, 2021 : Central Warehousing Corporation, Guwahati atanga Corporate Social Responsibility (CSR) kaltlanga ruahman Lunglei khawpui chhunga ‘BaLA Anganwadi Centre’ pahnih - Pukpui I&II Centre te chu vawiin khan Lunglei Bawrhsap Pu Kulothungan A, IAS in a hawng. Hawnna program-ah hian a kaihhnawih sawrkar official-te, Pukpui khawtlang hruaitute, Centre-a lemziak tu South Art Mizoram te leh sawm bik dangte an tel a ni.

Hawnna program CDPO Lunglei Pi Lalthlamuani Rokhum kaihhruaiah Lunglei DC Pu Kulothungan A chuan naupan tet laia inzirtirna leh inkaihhruaina (early childhood education) a pawimawh takzet a ni tiin Lunglei District tana CSR rawn pe tu Central Warehousing Corporation (CWC), Guwahati te chungah lawmthu a sawi a. Hmasawnna daih rei leh tlo nei turin zirna lama hmasawn chu thil pawimawh hmasa berte zing ami a ni tiin ‘BaLA Anganwadi Centre’ te chu khawtlang tana kawng hrang hranga hmasawnna thlentu anih ngei a beisei thu a sawi bawk. District chhunga zirtirtute tana fuihna thu sawiin an mawhphurna san zia hre thar tur leh an hna chu rawngbawlnaa ngaia an zirlai naupangte tana thahnemngai turin a chah a. Lunglei District zirlaite hmasawnna tura theihtawp chhuah zel a tum thu pawh sawiin Pu Kulothungan A chuan Anganwadi Centre-te bakah school lama hmalakna te pawh neih chhunzawm zel a tum thu a sawi a ni.

Pu MS Dawngliana, VCP Pukpui pawhin thu sawiin Anganwadi Centre pahnih changtlung tak Pukpui venga ruahman a ni chu hmasawnna ropui tak a ni tiin Lunglei DC leh a kaihhnawih Department te chungah lawmthu a sawi a ni.

‘BALA (Building as Learning Aid) Anganwadi Centre’ hmalakna hnuaiah hian Anganwadi Centre thlanchhuah ah te naupangte zirna kawnga puitu (learning aid) hrang hrang ruahman sak niin a building-ah hian lemziak thiam ten naupang hriat tur leh an rilru kaihruai tur pawimawh hrang hrang an ziah chhuah bakah naupang infiamna leh furniture thar te ruahman niin Centre tinah thlai chinna hmun (nutrition garden) te siam a ni. Tun dinhmunah Lunglei District-ah ‘BaLA Anganwadi Centre’ panga ruahman mek niin Rahsiveng I, Bazar III, Lungpuizawl II Centre te pawh hawn thuai tura beisei a ni. Heng Centre-ah te hian a building chhe tawh lai te thawm that leh siam that hna thawh tel a ni bawk.