No.3005/2021-2022

Aizawl, 16th November, 2021 : Nimin (15.11.2021) khan Union Finance Minister Pi Nirmala Sitharaman hovin state hrang hrang leh Union Territory hruaitute chuan virtual meeting an nei a. Mizoram Chief Minister pawhin CM office atanga chhimin, ei leh bara hmasawnna nawr kal tura pawimawh a tih leh Mizorama hmalak theih awmte a sawi a ni.

Union Finance Minister chuan hripui leng chu ram pum economy in tuar phah mahse, theihtawpa sawrkarin hma a lak zarah hrileng thawh hnihna hnuah beisei phak bakin tehfung hrang hrangah ramin hma a sawn chhoh thu leh, hripui len hmaa kan dinhmun ngai han awh hialna pawh sector thenkhatah a awm thu a sawi a. He hmasawnna hi chawmnung zel turin state tin ten theihtawp an chhuah ve a pawimawh thu a sawi a. Awl ai zawka pawnlam mi ten investment an tih theih nana statete inhawng tura chahin, sawrkar laipui pawhin economy hnarkaitu atan hmasawnna ruhrel din leh investment ah nasa taka tan a lak thu a sawi.

Chief Minister Pu Zoramthanga chuan sawrkar laipuiin India hmarchhak state te tan Gross Budgetary Support 10% a pek tur, harsatna chhan hrang hrang vanga la dawn si loh chu a chanve tal pekchhuah a nih chuan hmarchhak state ten hmasawnna hna an thawhnaa puitu tha tak leh, ram economy ah pawh an thawhhlawk phah ngei tur thu a sawi a. Heng bakah hian Mizoram bikah chuan hmasawn hna thawh tur hrang hrang zinga langsar ber leh tangkai tak tur, bamboo development a nih chungchang a sawi a. Amaherawhchu link road tha a awmloh avangin plantation hmun atanga factory thlen tur chuan hmun tam takah chuan mau hralhna man aia a phur man a to zawk avangin a hlawk theihloh thu a sawi a. Hemi anih avang hian link road siam a pawimawh thu a sawi a ni.

He meeting-ah hian Mizoram bakah Assam, Chhattisgarh, Goa, Haryana, Himachal Pradesh, Karnataka, Madhya Pradesh, Manipur, Meghalaya, Nagaland, Puducherry, Sikkim, Tripura, leh Uttar Pradesh Chief Minister te leh Jammu and Kashmir Lt. Governor te, Arunachal Pradesh, Bihar leh Delhi Deputy Chief Minister te an tel a. Andhra Pradesh, Gujarat, Kerala, Odisha, Punjab, Rajasthan, Tamil Nadu, Telangana, Uttarakhand, leh West Bengal atangin Minister te tel bawkin, Ladakh, Maharashtra, Jharkhand, Andaman & Nicobar, Chandigarh, Dadra and Nagar Haveli & Daman and Diu leh Lakshadweep aiawhin an sawrkar official te an tel bawk.

Chief Minister hi Chief Secretary Dr. Renu Sharma, Finance Commissioner Pu Vanlal Chhuanga leh Addl. Secretary Finance Dept. Pu Ramchuana ten an tawiawm a ni.