No.3006/2021-2022

Aizawl, the 16th November, 2021: Zirtawpni kalta zan atanga ruahsur avanga khawchhak Tuipui lianin Champhai leilet phaizawla harsatna hrang hrang a thlente chu tukin khan Champhai District Bawrhsap Pi Maria C.T Zuali chuan Line Department hotute hruaiin a hmunah tlawhin a enfiah. Heng hmunahte hian zau hrang hrang neitute, sangha khawitute leh khawtlang hruaituiten Bawrhsap hi an lo dawngsawng a ni.

Pi Maria C.T Zuali chuan tuilianin leilet phaizawl a chim avanga buh chingtute leh sangha khawituten harsatna nasa tak an tawk chu pawi a tiin, a tawrhpui takzet thu a sawi a. Tuilian avanga Champhai leilet phaizawla buh leh sangha khawi chantute chu State Disaster Response Fund (SDRF) kaltlangin sawrkar dan dinglai anga tanpuina pek tum an nih thu sawiin, an channa zawng zawngte tuamhlawm seng vek dawn lo mahse sawrkarin theihtawp a chhuah a, tawrhpuina leh ralna chu dan tlawhchhan ang zela pek chhuah tum a nih thu a sawi a. Loneitu leh sangha khawitu tuilian avanga harsatna tawk zawng zawngte chu an awmna pawl leh zau hrang hrang ang zela report kimchang siam tur leh, department katlangin a ranglama DC Office-a thehlut turin a hriattir a, a tul angin DC Office-in hma a lak sak nghal zung zung tur thu a hrilh a ni.

District Bawrhsap chuan van ruahtui tla bawk mahse khuarel nilo mihring siam chawp buh hmun leilet phaizawl hnar leh a chhehvel hnaivaia sumdawnna kudam sak leh lirthei dahna siamte chuan engemawchenah harsatna thui tak a thlen phah thu a sawi a. Buh chinna hmun leilet phaizawl thil danga hman chu dan kalh tlat a nih thu sawiin, thil danga hman tum avanga leilet hmun chhilha chhun pawng leh leivung paihna tur ni lova paihin Tuipui kuang a hnawh a, tuikawngten a nih dan ang tur pha lovin tun hma ai zawnga nasain lui kuang pawnah tui a luan chhuak phah ta a ni, a ti a. Lui kuanga leivung leh hnawm paih chuan lui a hnawh a, tuikawngte tipawnlangin tui chim chin sang zel leh tui hawk luanbona tur hre lovin harsatna a thlen thu pawh a tarlang a. Leilet phai chhunga leinawi leh hnawmhnawk hrang hrang lut avanga loneituten harsatna nasa tak an tawh thin thu pawh a sawi lang bawk.

Bawrhsap chuan dan lova leilet phaizawl leh a chhehvela hmalakna awmin harsatna a thlen tuar hmasa leh nasa bertute chu leilet phaizawla buh leh thlai chingtute bakah sangha khawitute an nih thu sawiin, nakin zela harsatna nasa zawk tawh loh nan khawtlang anga tangruala tun atanga ven lawka tanho thiam a ngaih thu a sawi a. Leilet phaizawl venhim leh humhalh kawngah theihtawp chhuaha lungrual taka thawhhopuiah phaizawl loneitute leh Champhai District mipuite a sawm nghal bawk a ni.

Tukina Champhai leilet phaizawla khawchhak Tuipui lianin harsatna a thlente enfiahna hunah hian Bawrhsap hi Pu B. Lalhmuchhuaka DAO, Pu B. Lalzarzova DHO, Er. Laldingliana Hrahsel EE, I&WRD, Dr. Lallawmkima DIPRO, Pu Lalchhuanawma AFO leh Pu Lalmalsawma FD ten an tawiawm a ni.

Bawrhsap hian vawiin chawhma khan ruahsur nasa avanga leiminin Ruantlang Mualveng V/C huam chhunga Pi Chuangkimi te chenna In (a ruhrel RCC, a dang Assam Type) zing dar 7:30 vela a tihchhiat tlusawp chhe vek chu a tlawh nghal bawk a. Sawrkar a?anga ?anpuina awm thei ang ang pek an nih tur thu a hrilh a ni. Vawiin khan In chhia senghawi hnatlang neih nghal a ni a, Champhai South bialtu MLA, Pu T.J. Lalnuntluanga, Law & Judicial Minister chuan tlawmngaia hnatlangte thingpui inna tur Rs. 5,000 a pe a, DC Office DM&R Branch kaltlangin Silpaulin 2 leh hnatlangte thingpui inna tur Rs 1,000/- pek a ni bawk.