3136/2024-2025

Khawzawl, dated 21st November 2024: Vawiin khan Khawzawlah Mizoram State Commission for Women leh District Programme Officer’s Office, Women and Child Development, Champhai District te chuan Awareness Campaign on Women Related Laws, Women’s Health and Nutrition chu Khawzawl Electric Veng YMA Hall-ah an buatsaih a, DC Pu K Vanlalthiana'n khuallian niin he hun hi a hmanpui. Khawzawl khawchhung a NGO hrang hrang aiawhte, Self Help Group, Anganwadi Worker-te leh school naupang hmeichhiate tel an thahnem hle.

He hun hi Pu Lalrinmuana, DPO, Champhaiin kaihruaiin, Pi C. Zodinpuii, Chairperson, Mizoram State Commission for Women chuan Welcome speech a sawi a, Chief Guest Pu K. Vanlalthiana chuan kalkhawmte hnenah thu a sawi a ni.

Pu K Vanlalthiana chuan MSCW leh DPO Champhaite tangkawpin Khawzawl District chhungah Awareness Programme pawimawh tak mai an buatsaih chu thinlung zawng zawing a lawm tih sawiin, programme chhim tur a rawn kalte chungah a lawmthu a sawi a. DC chuan hmeichhiate hi khawvel thilsiam zawng zawng ropui ber ni hial a hriatthu sawiin, Chrismas lo thleng mai tur a Lal piang kan lawm tur ngei pawh hi hmeichhe hrin a nih vang a rawn piang niin, hmeichhiate hi an hlu a, an hlutna hre zel tur a chahin an zahawmna an vawnhim theihdan tur ngaihtuah a hotu ten he hun an rawn buatsaih hi ngaihlu hle turin a chah a ni.

He hunah hian Pu Lalrinmuana, DPO, Champhaiin Cyber Security Awareness chungchangah kalkhawmte hnenah zirtirna a pe a. Chawhnu lamah Technical Session hman niin Pu Lalchhuansanga Sailo, Advocate; Pi Zonunpari Sailo, Member Secretary, MSCW; leh Pi C.Zodinpuii, Chairperson, MSCW ten zirtirna an pe a, Interactive session-te neih a nih hnuin Pi Vanlalrochhari, Member, MCSW in lawmthu sawina hun a hman hnuin programme hi tih tawp a ni.