3136/2024-2025

2024 Sahmulphah thla ni 21: Vawiin khan Doordarshan Aizawl News Director Pu Nampibou Marinmai IIS chuan Lunglei tlawhin, Lungleia sawrkar mi pawimawh ṭhenkhat a kawm bakah hmun pawimawh ṭhenkhat a tlawh bawk.

Doordarshan News Director chuan Lunglei SP Pu J. Lalmuankima chu a pisaah tlawhin, chanchin thar puanzar kawngah thurawn leh rawtna ṭha zawk awmte an dawnsawn theih reng thu hrilhin, Doordarshan chuan police leh mipuite nen thawh hona ṭha neih an ngaih pawimawh thu a sawi a. Lunglei SP pawhin dan leh thupek kenkawh chungchanga an hma lakna hrang hrang sawiin, Lungleia raltlan awm mekte chu DDK news thawktute leh police te nen ṭang kawpa bih chian hna thawh ho ṭul a tih thu a sawi a. DDK news chu chanchin thar huap zau leh rin tlak a nih anga an ngaih pawimawh ṭhin thu a sawi bawk.

Doordarshan News Director Pu Nampibou Marinmai hian District I&PR office pawh tlawhin, thawktute nen inkawmna hun an hmang a. Lunglei hming put chhan Lung-lei tlawh bawkin, sawrkar leh Lunglei mipuite'n a hlutna hre thiam a, thianghlim zawk leh mawi zawka, khualzin hip thei tura thuam ṭhat ṭul a tih thu a sawi a. Hei bakah hian Mizorama biak in hmasa ber, BCM Sethlun biak in leh Ramthar Venga raltlan chenna hmunte a tlawh bawk.