3138/2024-2025

2024 Sahmulphah thla ni 20: Vawiin khan Tlabung YMA Runah Lunglei District Agricultural Marketing Committee (DAMC) huaihawtin Tlabung RD Block huam chhunga thlai thlan bik chingtu society hrang hrangte tan Mizoram Bana Kaih ruahmanna hnuaia thlai thar (specified bik) hralh dan tur kalphung inhrilhfiahna (sensitisation) buatsaih a ni a. Tlabung RD Block huam chhunga society 21 ai awh mi 56 telin, thlai thar zawrh leh hralh chungchanga society-te mawhphurhna hrang hrang zir ho a ni.

He hun hi Lunglei DAMC Member Secretary, District Agriculture Officer (DAO) Pu VL Hmangaihchhunga chuan kaihruaiin, Mizoram Agricultural Marketing Board (MAMB) Co-opted Member Pi C. Zochansangi chuan thlai thar chi li - sawhthing, aieng, hmarcha leh hmunphiah hralh kalpui dan tur a sawi fiah a. Chawhnu lamah Lunglei District Horticulture Officer Pu B. Lalzarzova kaihhruaiin sawi hona leh zawhna leh chhanna hun hman niin, line department-te ai awhin DHO Pu B. Lalzarzova bakah, Pu S. Lalremngheta (District Cooperative Officer) leh Pu Lalzarzova (Range Officer, Land Resources, Soil & Water Conservation Department) te'n kal khawmte zawhna an chhang a ni.

Sensitisation programme hi block hrang hrangah hman tura ruahman niin, Lungsen leh Tlabung block-ah buatsaih fel a ni a, kar leh lamah Lunglei leh Bunghmun block-ah te buatsaih leh a ni ang.

Tlabung hi Lunglei District chhunga thlai thar hralh chhuah tur dah khawmna - secondary collection centre (SCC) pali zinga pakhat awmna hmun atan sawrkarin a ruahman fel tawh a. Zodin M-PACS Ltd Tlabung te chu MAMB aṭangin sawhthing lei thei tura phalna (empanelled buyer certificate) pek an ni tawh a, kg 1 ₹ 50/- aia tlawm lovin an lei dawn a ni.