KVK (Krishi Vigyan Kendra) Khawzawl buatsaihin vawiina Exhibition cum Awareness Programme on Pradhan Mantri Fasal Bima Yojana (PMFBY) neih chu he hun a khuallian Champhai Bawrhsap Pu Vanlalngaihsaka chuan a hawng a. Indian Council of Agricultural Research (ICAR) bultum, Khawzawl Electric Veng YMA Hall-a exhibition neihah hian thei, thlai leh pangpar entirsiak niin, crop insurance scheme PMFBY chungchang inzirtirna hun neih a ni bawk.

Bawrhsap Pu Vanlalngaihsaka chuan India ram mipui tam zawk chu kuthnathawk a eizawng annih  thu leh, a tam zawk chu ruahsur leh sik leh sa a thlai thar that leh thatloh innghat an nih vangin khuarel chhiatna leh thildang dang avangin loneituten harsatna an tawh thin chu Sorkar laipui pawhin a hristpui thu a sawi a. Kuthnathawktuten insurance an mamawhnate hriatpuiin, PMFBY crop insurance scheme a duan ta a ni, a ti a. He insurance scheme siam anih chhan leh hmang tangkaitu tur loneitute chuan an chhawr theih dan tur te chu hrethiam a ngaihven turin a chah a. Bawrhsap chuan loneituten an thlai thar tha tak tak entir tura an chhawpchhuah te chu lawmawm a tih thu a sawi tel a ni.

Vawiin hunah hian Champhai DAO leh ATMA Project Director ni bawk Pu RK Nithanga hnen atangin Agriculture leh ATMA hnuaia hmalakna te ngaihthlak a ni a. DHO Pu Lalhmangaiha hnen atangin Sorkar laipui atanga Horticulture hmalakna scheme hrang hrang te ngaihthlak a ni bawk.

Pi Lalrinawmi Renthlei, Senior Scientist, KVK chuan PMFBY chungchang tlangpui sawifiahna a nei a. Kumin January-a Prime Minister-in a tlangzarh niin, he insurance scheme hian India rama loneitu zawng zawng te a huam vek a; Loneitu ten awmze nei leh hlawk zawka thlai an thar theihna turte, khuarel chhiatna chi hrang hrang khaw kheng, tuilian, leimin, kangmei, thlai natna leh adang laka insurance an neih theihna tura ruahmanna siam a ni a. Amaherawhchu thlai zawng zawng a huam veklo a, SLCCCI-in thlai leh  thlanchhuah bik te insurance hian a huam a ni.

Pradhan Mantri Fasal Bima Yojana hnuaiah hian insurance sum dahkham (premium) zat hi a tlem thei ang bera ruahman niin, 90% chu Sorkar-in a tumsak dawn a. Fur thlai atan dahkham zat hi 2% niin, thlasik thlai atan 1.5% dahkham tur zat bituk a ni a. Loneituten venhimna pumhlum an chang anga, an sum dahkhamte khawih danglam leh tih tlem ani dawn lova. Chhiatna engmah tawh lo tum leh thlai thar zat a kiam loh tum (kumdang aia 80% aia thar tlem loh) kumah etawh insurance hi claim theih a ni lo thung a ni.

Vawiin hian loneitute hnenah Soil Health Card sem a nih bakah Farmer-Scientist interaction hun neih a ni a. Loneitute'n an thlai huan a harsatna an tawh hra ng hrang leh PMFBY chungchanga zawhna an neihte chu a khaihhnawih department mithiam ten an chhan sak a. Vawiin exhibition-ah hian Dog Show neih a ni bawk.