No.272/2021-2022

Dated Khawzawl, the 26th April, 2021: Vawiin chawhma dar 11:00 khan Pu Zothanmawia, Deputy Commissioner & Chairman, District Level Task Force on Covid-19, Khawzawl District hovin Khawzawl Town chhunga Covid-19 Executive Team Leader theuhte chu Mizoram sawrkar order anga April ni 20, 2021 atanga Covid-19 Containment Order kenkawh chungchang thlirletna neiin DC Conference Hall-ah an thukhawm. 

Bawrhsap Pu Zothanmawia chuan Covid-19 Executive Team Leader leh Member-te chu khauh zawka sawrkar thupek leh inkaihhruainate kengkawh turin a chah a. A bikin phalna nei loa pawn chhuak leh dawr hawng an awm leh awm lohte, phai atanga bungraw phur lo lut tawi khawmuang an awm em tihte enfiah uluk zual turin a chah a.  Duty tura ruatte chu Office lam nitin hnate awltir an nih thu leh  Covid-19 duty chu an hna pui ber a ni tih hriaa, taima leh thahnemngai taka duty thin turin a chah nghal bawk a ni. 

Pu PC Lalchunglura, Superintendent of Police, Khawzawl District chuan Covid-19 Containment Order hman mek a nih chhunga dan leh thupek kenkawh dan chungchang report a pe a. April ni 25, 2021 thlengin Khawzawl District Headquarters-ah Covid-19 Executive Team duty ten sawrkar inkaihhruaina siam zawm lo mi 59 an man tawh thu leh, pawisa chawitir tlingkhawm zat chu Rs. 5,900/- a nih tawh thu a sawi bawk. 

Team Leader-te pawhin khauh zawk leh awmze nei zawka duty kalpui a nih theih nana an mamawhte sawiin, rawtna an neihte pawh zau taka sawiho a ni bawk.

Meeting-ah hian Executive Team Leader-te bakah DC Office-a Officer-te,, 2nd IR Battalion Deputy Commandant leh Medical Officer i/c Covid-19 te an tel a ni.

Attachment

  • Loading attachment...