842/2024-2025

Khawzawl 17th. June, 2024 : Khawzawl Florist Association chuan vawiin khan Mualvawm Helipad chhehvelah Araucaria thing tiak phunin hnatlang an nei a, KFA Member te hi District Bawrhsap Pu K. Lalrohlua chuan a tawiawm a ni.

Hnatlang tan hma hian hun tawi hman a ni a. Hetah hian District Bawrhsap chuan thu sawiin Khawzawl Florist Association ten Mualvawm Helipad chhehvelah Araucaria thing tiak an phun tur chu lawmawm a tih thu leh KFA hnatlang hi remchangah hmangin Vengsang KTP leh Darngawn Branch MUP te pawh Helipad leh a chhehvel samfai turin an thawk chhuak dawn tih a sawi a. Thing tiak phun turte chu a phunah duh tawk mai lovin an lo puitlin theihnan enkawl chhunzawm zel a pawimawh dawn tih a sawi a, vawiina hnatlanga thawk chhuan Vengsang Branch KTP Member te leh Darngawn Branch MUP Member te pawh neitu chan changa thing tiak phun te chu venpui a, enkawlpui turin a chah bawk a ni.

Vawiin hnatlangah hian KFA Member te hi mi 15 thawk chhuakin Vengsang Branch KTP Member 85 leh Darngawn Branch MUP Member 40 vel an thawk chhuak a. Thing tiak 20 an phun bakah Helipad leh a chhehvel te an samfai vek a, thing tiak phun te hi an hung tha nghal vek bawk a ni.