841/2024-2025

Champhai, the 17th June, 2024: Local Administration Department (LAD) Minister Pu C. Lalsawivunga chuan vawiin chawhma khan Champhai khawpui chhunga LAD Office leh hmunhma pawimawhte tlawhin a enfiah.

LAD Department thawktute a kawmnaah LAD Minister Pu C. Lalsawivunga chuan Office kalphung siamthat ngai leh aikal lak chungchangah sawrkarin theihtawp chhuaha hma a lak thu sawiin, sawrkar hmalaknate tha taka thlawp turin a chah a. Thawktu indaihlohnate engemawchen phuhru turin sawrkarin a remchan dan ang zela hma a lak thu a sawi a. Department hmunhma tha tak takte tangkai zawka hman a nih theih nan inrawnkhawm chunga ngaihtuahna sen tlan a tul thu sawiin, infinchhuahtawn chung zela hmalak tlan a pawimawh thu a sawi bawk.

LAD Minister hian Champhai Kahrawt Venga LAD Office tlawhin thawktute a kawm a. Office mamawh thlente pawh enfiahin a tul angte lo enzui a tum thu a hrilh a. Champhai Vengsang PHE Venga LAD ram pawh tlawhin tangkai taka hman dan turte a sawipui a. Hemi hnu hian New Champhaia VC Rest House pawh tlawhin tun aia changtlung zawka cheibawl leh tangkai taka hman dan turte enfiahin tul angte department hotute a sawipui bawk a. Hemi hnu hian Champhai chhuahsanin Aizawl a pan a ni. 

LAD Minister Pu C. Lalsawivunga hi District Bawrhsap Pu James Lalrinchhana, DLAO Pu Moses Lalfakawma Tlau, DIPRO Dr. Lallawmkima leh LAD Staff te'n lo dawngsawngin an tawiawm a ni. 

Art & Culture Minister ni bawk Pu C. Lalsawivunga chuan tukin khan Dungtlang khuaa pipu sulhnu pawimawh tak Lianchhiari Lunglen Tlang leh Dungtlang khaw hmun hluite tlawhin humhalh kawnga hmalaknate a enfiah a. Dungtlang khaw hmun hluia Art & Culture Department hmalaknaa zirchianna, Archaeological Exploration & Excavation kalpui chungchanga pawimawh leh tul angte a enfiah nghal bawk. 

Art & Culture Minister hi Pu Vanlalhuma Singson, Archaeologist, Art & Culture Department chuan a tawiawm a. Dungtlang khawtlang hruaitute'n lo dawngsawngin pipu sulhnute fanpuiin hmalaknate an enpui a, hmalak tul leh mamawhte an lo thlen a ni.