No.2209/2020-2020

Vawiin chawhnu dar 2:00 khan Mizoram Teachers Federation in sawrkar-a Ambulance an hlan te zinga Khawzawl District ami tur chuan Khawzawl a rawn thleng a, Khawzawl DLTF on Covid-19 ten an chairman leh Bawrhsap Pu H. Lianzela hovin an lo dawng sawng.

Ambulance thar lawmna leh hlanna inkhawm tawiah DLTF on Covid-19 Chairman leh Bawrhsap ni bawk Pu H. Lianzela chuan Mizoram Teachers Federation ten mahni insengso-va mamawh hunlai taka Ambulance an pe chu lawmawm a tih thu a sawi a, mamawh huna thiante hi thian tak tak-te an ni an lo ti thin a, hei hi mamawh hun taka thil awm hlutzia sawifiahna anih angin Mizoram Teachers Federation ten mamawh hunlai taka ambulance an pe hi a hlu hle a ni a ti. Ambulance chu mamawh tuten tangkai taka an hman ngei a rin thu a sawi a, ambulance in Khawzawl a thlen theihna atana tul zawng zawng rawn ngaihtuah tu Pu Tawnluia, Deputy Chief Minister chungah lawmthu a sawi bawk.

Pastor K Vanlalzika, BCM Pastor-in Ambulance thar hi Pathian hnenah a hlan a, a hlan lai hian kalkhawm ten ambulance hi an din hual a ni. Ambulance hi DLTF enkawlna hnuaiah District Hospital-ah dah rih ani anga, a tulna apiangah hman ani ang. Driver hlawh pawh DLTF in a tum rih dawn a ni.

Vawiin chawhma lamah khan Mizoram Secondary School Teachers Association (MISSTA), Khawzawl Sub-Hqrs ten Covid 19 dona-a tul apianga hman atan Khawzawl DLTF ah Rs 1,00,000.00 (Nuai khat) an pe a, Pawisa hi Khawzawl DLTF on Covid 19 chairman leh DC Pu H Lianzela'n a lo dawng a ni.

Vawiin vêk khan Khawzawl District atanga swab sample lak 65 zinga 60 te result a chhuak a, an vai hian an negative vek ani. Sample 5 te erawh chu endik mek an la nih avangin result a la hriat loh thung. Sample-te hi June ni 4 leh ni 12 inkar-a lak ho kha an ni. Hetianga result a chhuah tâkah chuan Zonal Officer-te leh Nodal Officer-te an thukhawm nghal a. Tuna Test Result chhuak-a negative hote hi chu naktukah chhuahtir mai nise, Zonal Officer te'n a tul angin lo bawhzui nghal se an ti a. Test result la chhuak lote leh an awmpuite chuan test result chhuah lo nghak rih phawt se an ti bawk. Khawzawl District chhunga swab sample test result hriat tawh zingah positive awmsa 2 te tih loh sample 212 dangte chu an negative vek a, positive 2 te pawh an dinhmun a tha a, an sample test nawn turin ZMC-ah thawn leh mek ani.

Hetih lai hian State danga tangkhang Khawzawl thlen belh leh Quarantine Centre chhuahsan mek awm belh zel a. Nimin khan mi 2 an rawn thlen belh a, mi 44-in Quarantine Centre an chhuahsan thung. Heti hian tun din hmunah Khawzawl District chhunga Quarantine Centre leh Isolation Centre ah mi 126 an la awm mek ani.