206/2024-2025 

Khawzawl, 16th April 2024: Tukin khan Khawzawl Bawrhsap Pu K. Lalrohlua chuan Khawzawl District chhunga a thlawna sem tur zirlaibute chu DEO Office Complex, Khawzawl Vengthar atangin a vailiam.

Pu K. Lalrohlua chuan zirlai naupang ten a thlawna zirlaibu an dawng tur chu malsawmna ropui tak a nih thu sawiin an malsawmna dawn chu tangkai taka hmang turin zirlaite chu a ngen a. Zirna chu mi te leh mi lian intluktlanga siamtu ani tiin Bawrhsap chuan zirlaite chu zirna kawnga thahnemngai tur leh zirna hmanga hmasawnna kawng zawh turin a fuih bawk a ni. 

Pu PC Rosiama, Block Resource Center Coordinator chuan he hunah hian zirlaibu sem chhuah chungchang report a pe a. Zirlaibu hi Khawzawl District chhunga sawrkar enkawl leh aided elementary school te tan pek chhuah a ni a. Khawzawl District chhungah hian sawrkar hnuai Primary School 40 awmin, heng sikulah te hian zirlai 1586 (mipa 870, hmeichhia 716) an awm a, Middle school 36-ah zirlai 1479 (mipa 774, hmeichhia 705) an awm thung.  Sawrkar sikul a zirlai awm zawng zawng hi zirlai 3065 an ni a, an zavaia indaih tur, subject kimin pek chhuah theih a ni. Hei bakah hian Pre Primary School/ Balvatika-ah pawh Early Childhood Care and Education (ECCE) Fund atangin zirlaibu hi pek a ni a. Tin, kumin atang hian NEP 2020 in a phut angin Pawl 1 zirlai ten thla thum chhung chu an zirlaibu zir lovin, ziak leh chhiar leh chhiarkawp bulthut an man theih nan ‘Zirna Kailawn’ an zir phawt dawn tih tarlan a ni bawk.

Zirlaibu vailiamna programme hi Pu Andrew Lalrintluanga, SDEO chuan a kaihruai a. Zirlaibu te hian vawiin ngei hian Khawzawl District-a khua zawng zawng te a thlen hman beisei a ni.