3411/2023-2024

Khawzawl, 20th January 2023: Vawiin khan Khawzawl Bawrhsap Pu K. Lalrohlua chuan Chawngtlai khua a tlawh a. Chawngtlai khuaa hmasawnna hnathawh mek - Planning Department hnuaia Puantahna In sak te, FOCUS hnuaia Agriculture Link Road laih te leh Chawngtlai Playground laih mek te bakah khawtlang hmun pawimawh te a enfiah. Bawrhsap hi Khawzawl Addl DC Pu Lalfakzuala leh DIPRO Pu Lalchhuanawma Ralte ten an tawiawm a ni.

Chawngtlai khawtlang hruaitute nen Chawngtlai Inpuia an inkawmnaah Pu K. Lalrohlua chuan Chawngtlai khua chu Mizo Historical Village a puan an ni tih a lo hriat tawh thu sawiin - Mizo pi leh pu te sulhnu vawnghim a, an sulhnu te zahna chang an hria chu lawmawm a tih thu a sawi a. Chawngtlai chu District chhunga kuthnathawh leh infiamna kawnga khaw entawntlak ber pawl ni a a hriat thu a sawi bawk.

Pu K. Lalrohlua chuan zirna leh hriselna kawnga hmasawn chu mihring leh khawtlang thanna bulthut a nih thu a sawi a. Bawrhsap anihna angin heng kawng pahniha hmasawn chu ngaih pawimawh hmasak ah a nei thu a sawi bawk. Chawngtlai khawtlang hruaitute chu kawikawm thin ang thapa inlungrual tura chahin; mimal, chhungkua leh khawtlang nun run mek tu ruihhlo laka fihlim tura thalai te zirtir zel turin a ngen bawk a ni.

Khawzawl Bawrhsap Pu K. Lalrohlua hian Khawzawl Bawrhsap anih chhungin Chawngtlai chu ‘Khawzawl DC Model Village’ ah a puan thu a sawi a. Zirna, eizawnna leh hriselna kawngah hma an sawn zel theih nan theihtawp a chhuah pui tur thu a sawi a ni.

Inkawmhona hunah hian Chawngtlai khawtlang hruaitute leh tlawmngai pawl hruaitute hian an mamawh hrang hrang te Bawrhsap hnenah hian an thlen a. Pu Lalrohlua leh Addl DC Pu Lalfakzuala te chuan khawtlang mamawh te chinfel a nih theih nan thurawn te pein, hmalak pui theihna apiangah an tanpui tur thu an sawi a ni.

Inkawmhona hun hman zawh hian Pu K. Lalrohlua hian Planning & Programme Implementation Department ‘Village Level Development Programme’ hnuaia Entry Point Activity kaltlanga sak Puantahna in te, FOCUS hnuaia Agriculture Link Road km 5 a thui cheng nuai 20 senga laih te, Balaji Construction ten ‘Community Assistance’ hnuaia Football Ground tur an laih mek te, Lal Nikuala Lungphun, Khawpui tan tlang te leh khaw chhunga hmasawnna hnathawh dang te a tlawh a ni.

Chawngtlai Football Ground tur hi Khawzawl DC Office ngenna angin NH-06 khawih mektu Balaji Construction ten an laih sak a. Sawrkar pawisa seng miah lovin ni 41 zet khawl hmangin an lai tawh a ni.