3410/2023-2024

20^th January, 2024 : Vawiin khan Mizoram Youth Commission Chairman Pu Malsawmzuala Ralte chuan MS ACADEMY (A Coaching Centre for Competitive Exams) Khatla tlawhin an zirlai hlawhtlingte lawmpuina hun a hmanpui.

He hunah hian MS ACADEMY atanga MSSSB Combined UDC Exams 2023 a inziak tling mi 20 te hnenah lawmpuina a hlan nghal bawk a ni.

MYC Chairman Pu Malsawmzuala Ralte chuan MS ACADEMY atanga MSSSB Combined UDC Exam hautak zet paltlang mi 20 lokal leh an nu leh pa te chu a lawmpui tak zet thu a sawi a. Thalai tumruh, taima, leh teirei peih tan hlawhtlinna kawng a in hawng a ni tih vawiin ni a mi 20 atang hian a lang a ni, a ti a. Competitive Exam hi eng level mah hi awl ai a ni lo a, theihtawp chhuah a exam beih a ngai a ni tih kan hre theuh a, hna tha tak nei tawh tih thinlung pu mai lo a, ram tana rawngbawl turin Competitive exam sang zawk bei zel tura inbuatsaih turin a ngenin a sawm a ni. Mumal taka kan hun hman dan tur ruahmanna (plan) time table siam a pawimawh thu leh hun vawn dik kawngah pawh tan la a, hun vawng dik mi chu a inthlahdah ngai lo a ni tih sawiin, sorkar hna chu ram tana rawngbawlna pawimawh tak a ni tih hria a, thahnemngai taka thawk turin leh an kal zelna turah duhsakna sang ber a ni.

Hlawhtlinna chang Aspirant nu leh pa hnen atangin thusawi tawi ngaihthlak a ni a. Dr. Malsawmdawngliana Lailung, Managing Director chuan kalkhawmte lo lawmin report tawi a pe a ni. Pi Lalthakimi Ralte, Faculty chuan kaihruaiin, Dr. Saithantluangi Zote chuan he hunah hian lawmthu sawiin he hun hi a khar a ni.

MS ACADEMY, Khatla hi August ni 9, 2019 a hawn a ni a. State Competitive Exams (Group A & B) turte tan Coaching pek a ni a, tun dinhmunah hian aspirant 3254 in Mentoring Programme, Test Series, Mains Crash Course, Prelims cum Mains, Group B Gazetted & Non-Gazetted Coaching Class an zawm tawh a ni. Motto-ah 'Make a Difference'/ 'Danglamna siamtu' tih he Centre hian a hmang a ni.