No.6515/2020-2021
Dated Khawzawl, the 11th November, 2020 : Myanmar atanga dan phal loh bungrua chi hrang hrang lak luh doletna tura Khawzawl Tuisenphai bula Temporary Check Gate siam chu vawiin chawhnu dar 2:00 khan Khawzawl District Bawrhsap Pu Zothanmawia chuan a hawng a, Check Gate hawnnaah hian District Executive Force aiawhte bakah Forest Deptt., AH & Vety Deptt. aiawhte, Group YMA leh Joint YMA hruaitute bakah MJA Member-te an tel a ni.
Addl. DC Khawzawl Pu Lalrohlua kaihhruai Check Gate hawnna puala inkhawm tawi buatsaihah Khawzawl District Bawrhsap Pu Zothanmawia chuan Lirthei lut leh chhuak chhinchhiaha endikna tur Temporary Check Gate hawn a ni ta chu lawmawm a tih thu sawiin, Mizoram leh Khawzawl District himna tura thil tha anihna chuan a ti phur hle tih a sawi a. Helai hmun chauh a Check Gate siam chu a tawk lo tih sawiin, Rabungah pawh Check Gate siam a lo ni tawha, Rabung Check Gate siam tura ruahmanna an siam atanga ni hnih thum hnu leka Duty tur Khawzawl DFO (Wildlife) Pu C. Lalthankima'n an Staff-te a ruahman fel nghal chu lawmawm a tih thu a sawi bawk. DC chuan Check Gate siam puitlin lo ni ta chu tanrualna rah a ni tiin helai hmun a Duty tur hian YMA te an beisei thu leh VC te pawh an hman changa Duty ve turin a sawm a, a theih anga zanlamah pawh Duty te tawiawm thin turin a sawm nghal a ni.
Addl. S.P. Pu Lalringliana Pachuau in a tarlan danin, kumin January atanga October thla thleng khan Khawzawl Police te chuan Dan kalh a bungraw phur Motor 71 bakah Kuhva Bag 1272, Foreign Cigarettes Case 30 leh Poppy Seeds Bag 38 an man a, Dan phal loh thil an man hlut zawng hi Rs.95,38,204/- a tling a. Heng bakah hian dan lova Vawk lak luh thahnem tak an lo man tawh bawk.
Check Gate hi thla hlui October ni 24, 2020 atanga buaipui tan niin, Check Gate atan hian Tuisenphai bula Waiting Shed chu cheibawl a ni a, hna tan ni hian SP, DFO, DVO leh P&E Deptt. Staff te bakah Joint YMA hruaitute hnatlangin an thawk chhuak a, hetah hian mi 15 an thawk chhuak thei a. Check Gate siam nan hian tha 27 sen a nih bakah sum cheng singnga chuang sen ral a ni.
