Dated Khawzawl, the 11th November, 2020 : Vawiin khan Khawzawl DC Conference Hall-ah Khawzawl District Consultative Committee/District Level Review Committee chu Chairman Pu Zothanmawia, Khawzawl Bawrhsap hovin an thukhawm.

District Bawrhsap Pu Zothanmawia chuan thu sawiin, mipuite zingah Bank kalphung hre lo tak tak an la tam thu leh heng mite hian Bank kalphung an hriatchian theihna turin mipuite hrilhhriatna kawngah tanlak a tul thu a sawi a. COVID-19 hripui leng mek vangin Financial Literacy Campaign-te duh angin buatsaih theih ni tawh lo mahse Bank hrang hrangte chu TV leh chanchinbu bakah Social Media lamahte tanla a, mipuite tan Local TV-ah te Talk Show buatsaih theih nise a duh thu a sawi a ni.

Vawiin Khawzawl DCC/DLRC Meeting a tarlan anih danin Khawzawl District chhungah hian kumin June thla tawp thleng khan Bank Branch 7 awmin ATM 3, Business Correspondent 9 a awm a, Indian Post Payment Bank awmna khua 18 a awm bawk a. Kumin June ni 30 thleng khan Khawzawl District chhung Bank hrang hrangah pawisa Deposit nuai 12070.70 awmin Loan pek chhuah cheng nuai 6158.15 a awm a, CD Ratio chu 51.02% a ni. Agriculture Loan cheng nuai 1712.22 pe chhuakin MSME Loan cheng nuai 1249.55, Education & Housing Loan cheng nuai 732.76, PMEGP cheng nuai 45.10 leh PMAY/Housing for All cheng nuai 293.00 pek chhuah a ni bawk.