No.4754/2020-2021

Dated Khawzawl, the 4th September,2020: Vawiin chawhnu khan Khawzawl District Bawrhsap Pu Zothanmawia chuam District Level Teacher Award 2020 for Primary Section chu Rabung Primary School-I Zirtirtu Pu Rochungnunga Ralte hnenah a hlan a, District Level Teacher Award 2020 hi Champhai District Un-divided anga kalpui a ni.

District Level Teacher Award 2020 hlanna puala inkhawm tawi, Khawzawl SDEO Pi K. Lalsiamliani kaihhruaia DC's Conference Hall a neihah District Bawrhsap Pu Zothanmawia chuan Khawzawl District atanga zirtirtu tha chawimawina dawng thei an awm chu ropui a tih thu a sawi a. Zirtirtute chu ngaihsanawm leh Mizote pawhin kan ngaihsan an ni a, an chhungkua an enkawl fel a, an fate pawh lehkhathiam tak takah an chhuah a, Kohhran leh pawl hrang hrangah mi tangkai, ruihtheih thil a inhnamhnawih lo leh mite mithmuhah mawi lo takin an che ngai lo, a ti a. Zirtir hna chu hna zahawm a ni a, zirtirtu tha chu khawtlangah pawh mi rinkai a ni, a ti a. Zirtirtute chu an pawimawhnate hriain an hnaah theihtawp chhuah zui zel turin a fuih a, an zirlaite chu nungchang tha, rintlak leh chhawrtlakah chhuah tum turin a fuih a ni.

District Level Teacher Award 2020 dawngtu Pu Rochungnunga Ralte pawhin thu sawiin, Zirtirtu tha Award a dawng chu lawmawm a tih thu leh hei hi chonaah ngaiin, tha zawk a hna thawk turin a theih tawp a chhuah zui zel dawn tih a sawi a. District Level Teacher Award hian pawisafai Rs. 5,000/- Certificate leh Momento a keng tel a ni.

Vawiina hun hmanah hian Khawzawl khawpui chhunga Govt. Middle School Headmaster-te leh Primary School Teachers Association hruaitute bakah MJA Member te an tel a. SDEO Pi K. Lalsiamliani'n District Level Teacher Award dawng tur thlanna neih dan a sawi a, Addl. DC Pu Lalrohlua'n lawmpuina thu a sawi bawk a ni.