No.4755/2020-2021

Vawiin khan School Education Complex Conference Hall, Mc Donald hill-ah Aizawl District huamchhunga zirtirtu hnathawk tha thlan chhuahte hnenah District Award hlan a ni.

Pu Lalhmachhuana, Joint Director leh State Project Director Samagra Shiksha chuan thusawiin zirtirtu hnathawk tha chawimawi tlak an tam viau laiin Award hmuh dan kalphung tharah mahni inphochhuah a tul tak avangin zirtirtu tha tam takin an hreh a ni, a ti a. National Award pawh Mizoram chhunga zirtirtu zingah hmu an awmloh nachhan ni a lang chu zirtirtu tha kan neih loh vang ni lovin Award hi mahni ngeiin dil a lo ngai ta a, a dawng thei tura kan inlan that loh vang a ni, a ti a. Tunlai khawvelah chuan inphochhuah leh dil hi kan hreh loh a ngai a, chu chu national level-ah pawh kan hmel lan nan a pawimawh a ni, a ti bawk.

Pu Lalhmachhuana chuan naupang hi sikul luh hunah an luh a, kaihruaitu tha an neih phawt chuan mi puitlingah an chhuak thin, a ti a. Kum 2001 sikul kal rual kal lo survey neihah naupang 22000 an awm a, tunah hian 3500 vel lut lo an la awm tih sawiin khawtlang nun nuam nei turin leh thawhchhuah nei turin thiamna neih ngei ngei a ngai tawh, a ti a. Sikul kal rei peih lova tawp ta mai te hi camping nikhuaah pawh hrual har an ni fova, Central Jail-a tang leh Aizawl Police station a case nei zaa 95 chuang hi HSLC hnuai lam lehkha thiam lo an ni tih sawiin lehkha an zir thui hian sual tura thlemna thui tak an pumpelh a ni, a ti bawk.

District Award hi Aizawl District huamchhunga zirtirtu tha thlan chhuah mi pathum hnenah hlan a ni a, chungte chu-
1. Pu Zoliana Headmaster Govt Chite Primary School
2. Pu R.Lalhuliana Headmaster Modern English School
3. Pu C.Lalhluna Headmaster Govt Bethlehem Vengthlang High School

District Award hian tangkafai Rs 5,000/- leh citation a keng a ni.

Aizawl District huamchhunga zirtirtu tha thlannaa District-in a chhawpchhuah kal zelah Pu R.Lalpianthanga, Teacher, Govt Chawnpui Primary School chuan State Award a lo dawng tawh a ni.

District Award hlanna inkhawm Pu Lalramthianghlima, DEO kaihhruaiah hian Aizawl District chhunga SDEO, CEO, Samagra Shiksha Officer-te leh zirtirtu thenkhatte an kalkhawm a ni.