74/2024-2025 

Khawzawl, 5th April 2024: Vawiin khan Khawzawl Bawrhsap Pu K. Lalrohlua chuan Govt. Model High School, Khawzawl Vengthar Building Extension hawnna leh HSLC Center-a hlankai an nih lawmna hun a hman pui.

Sikul tuala inkhawm tawi hmanah Pu K. Lalrohlua chuan hian zirna a ngaihpawimawh thu sawiin Govt. Model High School ah HSLC Exam Center dah thar a ni chu thil lawmawm tak a ni, a ti a. Exam Center neih chu thil hlu tak a ni tiin, zirna kawnga hmasawn phah nan a hmang turin zirlaite kalkhawmte chu a ngen a ni.

Bawrhsap hian zirna chu mi lian leh mi te intluktlanga min siamtu a ni tiin zirna kawngah zir luat a awm lo a, vawiina an dinhmun thlak thleng an duh chuan  theihtawp chhuaha lehkha zir turin zirlaite chu a chah a ni. Khuallian hian zirlaite chu eng kawng pawh zawh dawn se, lehkhathiam a pawimawh tih hre reng tur leh; ruihhlo leh zuk leh hmuama fihlim turin zirlaite hi a chah bawk.

Vawiin inkhawm hi Pu Lalfakzuala, Khawzawl Vengthar VCP chuan a kaihruai a. School Managing Board Member te, zirtirtu leh zirlai te an tel.

Govt. Model High School hi Exam Center-a hlankai a nih hian a bulding-in a zawh loh avangin tuna hawn tak Building hi Bialtu MLA hmasa Pu Tawnluia leh MLA ni lai Pu W. Chhuanawma te MLA Fund hmanga sak pum a ni a. School bungrua leh thil dangah DC Office, District Education Office leh Village Council te pawn tha nasa takin an thawh bawk a ni. Building sak thar hi a dung feet 40, a vang feet 15 a zau a ni a.  Headmaster Room feet 12*15 a zau sak tel a ni bawk. A sak nan hian khawtlang, zirtirtu leh zirlai ten tha nasa taka thawhin, cheng nuai 7 vel hmanga sak pum nia ngaih a ni.

Govt. Model High School, Khawzawl hi kum 1990 khan din a ni a. Kum 2003-ah Lumpsum-ah hlankai a ni a, 2008-ah Grant-in-Aid ah hlankai a ni leh a, kum 2023 khan Provincialise a lo ni ta a ni. He sikul hi Kum 2024 HSLC Exam atangin Exam Center-ah hlankai a ni bawk a, Govt. Model High School-ah hian heng Govt. Chawngtlai High School,  Govt. Tualte High School,  Presbyterian English School (Khawzawl Vengthar Pastorate), Grace Foundation School, Neihdawn High School leh St. Joseph School te an in exam a ni. Kumin HSLC Exam-ah khan candidate 124 in exam an hmachhawn a ni.