No.3788/2021-2022


Aizawl, the 24th January, 2022: Vawiin khan Pu C.C. Lalchhuangkima, Deputy Commissioner, Khawzawl District chuan Airtel leh BSNL a thawktute kawmin, Khawzawl District-a mobile leh internet signal tha zawk a awm theih nana hma lak dan tur a sawipui.

District Bawrhsap Pu C.C. Lalchhuangkima chuan Khawzawla Airtel distributor te titi puiin, Covid-19 hrileng dona kawngah inbiakpawhna tha a pawimawh hle tih a sawi a. Hrileng vanga zirna in tam tak khar a nih avangin online-a zirna pekchhuah a ngai a, hun dang aiin mobile leh internet signal chak leh rintlak mamawhna a sang hle tih a tarlang a. Airtel signal pekchhuah kawnga Khawzawl District-a mawhphurtute pawh biakpawh niin, Khawzawla Airtel tower awm mek chu thawmthat (upgrade) tura hma lak mek a nih thu Bawrhsap hi an hrilh a ni.

Bawrhsap chuan BSNL tower bunna tura Khawzawl Dinthar venga ruahmanna pawh a hmunah kalin a enfiah a. Covid-19 hrileng dona kawnga thawktute, zirlai leh nu leh pa bakah mipui nawlpuiin mobile leh internet signal chhia vanga harsatna an tawh loh nan chak taka hmalak a tul tih a sawi a ni.

Khawzawl District-a telecommunication service tha leh changtlung zawk a awm theih nana hma la chhunzawm turin thuneitu sang zawkte hnenah ngenna thlen nghal a ni bawk.

BSNL tower bunna tur a tlawhnaah hian DC hi Sub-Divisional Engineer, BSNL Champhaiin a tawiawm a ni.

Attachment

  • Loading attachment...