No.3789/2021-2022
Dated Aizawl, the 25th January, 2022: Vawiin khan Serchhip DC Conference Hall ah National Voters' Day, 2022 lawmna buatsaih a ni a. Pi Nazuk Kumar, IAS, Serchhip District Election Officer chu khuallian a ni.

Pi Nazuk Kumar chuan, vote thlaka ram hruaitute thlang thin ram kan ni hi kan vannei em em a, he kan vanneihna hi chhawmnung zel tura tan kan lak a pawimawh hle a ni. Election Commission of India chuan mipuiten kokim taka vote kan thlaka, mitin huapzo sawrkar din a nih ngei theih nan beihpui a thlak thin a, nasa takin mipuite zirtirna a kalpuia, Polling Station te pawh taksaa harsatna neite tana remchang turin a buatsaih zel a, hmeichhiate pual bik Polling Station te a siam hial thin. Chuvang chuan mipuiten vote thlak huna vote kan thlak ngei hi a pawimawh a ni tih hriat thar leh nan i hmang ang u, tiin kalkawmte a chah a. Tun hnai lawka tlangzarh tak Electoral Roll thar a puitlin theih nana thawktute chungah lawmthu sawiin, voters thar zawng zawngte a lawmpui thu a sawi a, inthlanna a lo awm hunah vote pawh thlak ngei tura chahin ram inrelbawlna lama nitin thutharte pawh ngaihven ve deuh zel turin a chah a ni.

Khuallian hian voter thar thlan chhuahte hnenah Electoral Photo Idendity Card (EPIC) hlanna a nei a, Pi Lalrinchhani Ralte, Election Officer kaihhruaiin Serchhip khawpui chhunga BLO te hnenah an bial chhung theuhva EPIC te semchhuah nghal a ni bawk.

He hun hi Pi C. Laltleipuii, SDO Sadaar in a kaihruaia, Pi Lalzikpuii, SO kaihhruainain kalkhawmten voters thutiam an sawi rual a. Kumin hi Voters' Day vawi 12 na niin Election Commission of India chuan kumin thupui atan "Inthlanna huapzo, mitin ban phak leh mitin telna buatsaih" tih chu a thlang a ni.

Attachment

  • Loading attachment...