No.7275/2020-2021
Deputy Commissioner & District Level Task Force on Covid-19, Khawzawl District Pu Zothanmawia chuan vawiin khan Mizoram sawrkar thuchhuak No.B. 13021/101/2020-DMR/Vol-III dated 16.01.2021 in a tarlan angin Covid-19 hrileng vanga inkaihhruaina hnuaiah chhiatni thatni chungchanga hriattirna a chhuah.
Thuchhuahin a tarlan dan chuan Khawzawl district chhunga khua/veng ah mitthi vuina leh inneihna (man hlan, inneih inkhawm leh reception) ah te a hmun-a leng zat 50% aia tam lovin a punkhawm theih ang a; amaherawhchu, mipui pungkhawm hi mi 100 aiin an tam tur a ni lo. Heta mipui pungkhawm tur zat sawite hian ei/in siamtu, usher leh programme hlawhtlin theih nana tawiawmtu/chhawrte zawng zawng a huam a ni.
Chhiatni/thatni puipunna-a kenkawh tur Khawzawl DC office order No. J.12019/17/2020-DC(KZL)/Vol-V dated 03.09.2020 in a tarlan kaihhruainate chu hman chhunzawm zel tur a nih dawn thu hetiang hian a tarlang bawk.
1. Mitthi vuina-ah hian chhungkhat laina pawh a tlem thei ang ber kal thin nise, association/pawl aiawh mi 2 (pahnih) aia tam kal loh tur a ni. Kalkhawm theih zat leh kalkhawm turte hi a veng neitu YMA leh VLTF te'n tlangau hmanga puanzar thin ni se.
2. Social distancing a awm theih nan kohhran/community hall emaw, veng
chhunga hall remchangah emaw a tuldan angin Biak In-ah emaw invuina hun hman tur a ni. Hemi atan hian mitthi lawina kohhran leh a veng neitu YMA leh VLTF te'n ruahmanna an siam ang.
3. Chhiatni thatni-a kal zawng zawngte hmingpum, address leh contact number chhinchhiah tur a ni a, a remchan dan angin YMA leh VLTF te'n ruahmanna an siam ang.
4. Chhiatni/thatni puipunna hmunahte zai/zaikhawm loh tur a ni.
5. Mitthi vuitu tur chu a theih hram chuan kum lama upa lo leh mi hrisel pangngai a ni tur a ni.
6. Chhiatni/thatni leh a kaihhnawih punkhawmna-ahte hian kum lama upate leh hrisel lohna, natna benvawn neite kal loh tur a ni.
7. Mitthi vuina-ah hian thingpui sem loh tur a ni.
8. Chhiatni/thatni-ah mipui kalkhawmte'n face mask an vuah vek tur a ni a. Thusawi, thupuan leh tawngtai lai phei chuan mask phelh miah loh tur a ni.
