2896/2023-2024

Khawzawl, 1^st December 2023: Vawiin khan Khawzawl District Election Officer Pu K. Lalrohlua Khawzawl Bawrhsap ni bawk chuan a Office Chamber-ah Khawzawl a thuthar thehdarhtute kawmna hun a hmang a. December ni 3-a Mizoram Inthlanpuia vote tla te chhiar tura Khawzawl District inbuatsaihna hrang hrang te sawiin, inkawmna hun hlawkthlak tak hman a ni. DEO hian thuthar thehdarhtute hi Counting Day-a Counting Center-a luh phalna Lehkha – Authority Letter a hlan nghal bawk.

1. Inthlan thlirletna: Inthlan hmasa aiin Khawzawl District (22-Tuichang AC) ah  vote a tla tha zawk a. Kum 2018 ah khan Electronic Voting Machine-ah vote 100 zela 79.06% a tlak laiin, kumina EVM a vote tla ringawt hi za zela 82.39% a ni. Kum 2018 khan Service Voter 98 awmin, kumin hian 97 an awm a; 2018 khan ETBPS kaltlang hian vote 13.9% chauh a tlak laiin, kumin hian vote 17 a tla tawh a, hei hi za zela 17.52% ang a ni. ETPBS hi 97 thawnchhuah atangin 37 download a ni a, December ni 3 zing dar 08:00 hmaa rawn lut hman chu pawm an ni dawn a. An vaia an rawn thlen kim chuan vote 20 laiin vote tla hi a la pung leh thei dawn a.

Tuichang bialah hian EVM-ah vote 14426 a tla a, Postal Ballot (Home Voting, Official leh Service Vote) Vote 435 a tla tawh bawk a ni. Tun dinhmuna vote tla zawng zawng hi 14861 niin, za zela vote 84.41 a ni a. Inthlan hmasa aiin vote tla hi za zela 4% chuangin a pung tihna a ni.

2. Counting Day atana inpuahchahna:

i) Venhimna chungchang: Sub Headquarters YMA PlayGround/ Field no 1, Khawzawl Zuchhip Vengah motor zawng zawng park tur a ni, Hmuhma a chep deuh avangin Counting Official leh Counting Agent te hi Counting Center pan turin ke a kal tur a ni a; phalna nei te chauh Counting Hall bul thleng motora kal theih a ni ang.

Strongroom hi thuah thum a ven niin, CAPF Platoon khatin a chhung berah an veng a, a laiah hian Mizoram Armed Police te an awmin, a pawn berah Executive Magistrate leh Mizoram Police te an duty bawk ang.

Countng Hall-ah hian Counting Official leh Counting Agent te luhna hran siam a ni a, EVM chhiarna dawhkan 14 leh Postal Ballot chhiarna dawhkan 1 ruahman a ni. ETPBS (Service Voter) te vote scanna hmun tur dawhkan siam a ni bawk. Counting Observer Pu Amit Singh Bansal hi vawiina lo thleng tura beisei a ni.

Vote chhiar tur hian Counting Supervisor 20, Counting Assistant 22, Counting Micro Observer 20 ruat an ni a, Political Party tin ten Counting Agent 15 theuh an nei ang. December ni 3, zing dar 5:00 am ah Counting Official te thutna tur thlan fel (randomize) a ni ang a, an thutna tur hi vote chhiar niah chauh an hre chawp dawn tihna a ni. Counting Agent leh Staff te hi zing dar 06:00 ah vote chhiarna hmun thleng vek tura beisei an ni a,DC Office-in eitur a ngaihtuah ang.

Counting Official te hi zing dar 07:00 ah Hall chhungah luh vek tur a ni a, hriattur tul leh pawimawh inhrilhhriat a nih hnuah zing dar 08:00 atangin Postal Ballot-a vote tla te chhiar tan a ni ang a, zing dar 08:30 ah EVM-a vote tla te chhiar tan an ni thung ang. Hall chhungah hian engmah ken luh phal a ni dawn lo a, Mobile Phone leh mimal bungrua (bag etc) te dahna hmun bik siam a ni ang.

Vote chhiar hi dawhkan 14 ah round hniha zawh tum a ni a. Postal Ballot leh EVM a vote tla te chhiar zawh vek a nih hnuah Polling Station panga (random, draw of lots hmanga thlan chhuah) a VVPAT Slip te chu EVM a vote tla te nen an inmil em tih finfiah turin chhiar leh an ni ang a. VVPAT Slip chhiar zawh anih hnuah chauh result hi official-a puanchhuah theih a ni ang.

ii) Media Center: Mipuite hriatturin round tina vote tla leh Postal Ballota vote tla te hi Loudspeaker hmangin puan chhuah tur a ni a. Media Center atangin DIPRO leh Media mi, Election Commission in Authority Letter-a pek ten mipuite hriatturin an puang zar ang. Inthlan result hi ENCORE Portal-ah dahluh zel a ni dawn a, results.eci.gov.in ah ngaihven theih a ni bawk ang. Chuvangin, mipuite Counting Hall leh a chhehvela kal ngai chuang lovin inthlan result hi puan tum a ni a, mipuite mahni in lam atangin result hi lo ngaichang mai tura ngen an ni e.

iii) Media Center inkaihhruaina: Chief Electoral Officer Office in November ni 24, 2023-a Lehkha a tihchhuahin a tarlan angin, Media Center-ah hian ECI-in Counting Day-a Authority Letter a siam sak te chauh luh phal a ni dawn a. Thuneitu ten ruahmanna an siam ang zel chauhin Counting Hall-a luh tur a ni ang a, thla la tur te tan video long shot hmang chauha thla lak phal a ni. Counting Hall-ah hian Mobile Phone leh Dan phal loh bungrua lakluh phal a ni dawn lo a, thlalakna atan pawh hian Camera pangai chauh hman phal a ni. Counting Hall luh dawnin Media Center-ah Mobile phone dah zel tur a ni a, Media Center-ah hian Mobile Phone hman theih a ni ang.