No.1518/2021-2022

Dated Khawzawl, the 22nd July, 2021: Pu Zothanmawia, Deputy Commissioner, Khawzawl District chuan vawiin chawhnu dar 1:00 khan National Highway No. 6 (Seling-Champhai) double lane-a laih zauh hna thawh chhoh mekah, Khawzawl leh Champhai inkar kawngpui KM 26.78-a thui laih bultan tur chu Khawzawl Lungvar veng JNV gate bulah a hawng.

Khawzawl District Bawrhsap Pu Zothanmawia chuan thu sawiin, hun rei tak atanga khawchhak tlang dung mipui ten an lo nghahhlelh tawh, kawng tha leh tawi zawk siam hna a taka kalpui a ni tur chu lawmawm a tih thu a sawi a. Hna avanga Champhai a lo awm tawh thin thu tarlangin, Champhai leh Aizawl inkar darkar 7 vel thang a tul thin a, fur lai phei chuan zin kawngah rei tak tak thang a ngai thin a ni tiin, double lane kawngpui laih zawh hun tur chu nghahhlelhawm a tih thu a sawi a. Pu Zothanmawia chuan Khawzawl DC-a a thut lai ngeiin kawng sial zauh hna thawh a ni ta leh, Dulte daia kawng laih zauh hna thawktuten hna tha taka an thawk chu lawmawm a tih thu a sawi a. He kawngpui hi kut hnathawktute tan pawh malsawmna a nih tur thu sawiin, an thlai thar chhuahte awlsam zawk leh hun reilote chhungin Aizawl an panpui thei tawh dawn a, a nghahhlehawm takzet a ni, a ti bawk.

He hunah hian Pu Lalrohlua, Additional Deputy Commissioner pawhin thu sawiin, Khawzawl DC office chu kawng laih zauh hna thawh tur atana ram lak chungchang khawihtu an nih angin, theihtawp chhuaha DC hova hma an lak dan tlangpui a tarlang a. Ani bakah hian Champhai NGO-Coordination Committee aiawhin Pu David Thangluaia leh Sub-Headquarters YMA Khawzawl aiawhin Fin. Secretary Pu Lalnunenga ten thu an sawi bawk a ni.

Tuna State Highway hman mek, Khawzawl leh Champhai inkar kawng hi kilometre 40 a thui a ni a. Kawngpui laih thar tur hi KM 26.78-a thui tur a ni a, km 13 zetin a hma aiin a tawi zawk dawn a ni. He kawng hi Rs. 37,04,32,00,000/- senga laih turin niin, NHIDCL hnuaia Contractor, M/s Shri Balaji Construction Company ten an thawk dawn a, kum 2 chhunga lai zo tur leh kum 5 dang enkawl zui tura ruahman a ni.