No.1517/2021-2022

Aizawl, 22nd July, 2021 : Vawiin khan SAD Conference Hall, MINECO ah Aizawl khawpui leh a chhehvel hmun thenkhata sample test runpui (mass testing) neih mek chungchang sawiho a ni a. He hun hi Health & Family Welfare Minister Dr. R. Lalthangliana'n kaihruaiin, MOT Chairman Dr. ZR Thiamsanga, MLA, Aviation Principal Consultant Wing Commdr J. Lalhmingliana leh Health Secretary Pu R. Lalramnghaka bakah Health Department hotute, leh ZMV hotute an tel a ni.

Health Minister Dr. R. Lalthangliana chuan Total Lockdown puan chhunga Aizawl khawpui leh Mizoram hmun hrang hrangah COVID-19 hri pui inkaichhawnna chhu chat tura theihtawp chhuahna pakhat atan sample test runpui hi kalpui a nih thu a sawi a, chhuah a ngai a, hei hi lockdown kan kalpui chhan ber pawh a ni, a ti a. Sample test kit kan chah a hun taka a rawn thlen theih loh mai kan hlauh laiin Principal Consultant Wing Commdr J. Lalhmingliana’n theihtawp min chhuahpuina avangin Kolkata Airport-a test kit parcel 82 tang reng chu vawiin khan parcel 75 rawn thlengin karleh thawhlehniah parcel 7 a rawn thleng leh dawn a, tluang takinn hma kan la chhunzawm zel thei dawn a ni, a ti.

Wing Commdr Pu J. Lalhmingliana pawhin tuna delhi Airport-a test kit parcel 100 la tang pawh chu naktukah Delhi-Aizawl direct flight Indigo Airlines hmangin rawn phurh thlen a nih tur thu a sawi bawk a. May thla tir atanga July ni 21, 2021 thlengin thlawhtheihna vawi 58 (May – 23, June – 17, July 21 thleng – 18) a service tawh thu leh khualzin 7190 (May – 2769, June – 2488, July2 1 thleng – 1993) an rawn luh tawh thu sawiin, khualzin rawn thlawk lut/haw zingah Lengpui Airport Screening Point-ah COVID-19 hri kai mi 118 (May – 97, June – 8, July 21 thleng – 13) an hmuhchhuah tawh thu a sawi a. Passenger rawn lut zinga 1.64% positive an nih thu leh thlawhtheihna pakhat zelah COVID-19 positive 2.03% hmuchhuah an ni tih sawiin, tun dinhmunah chuan rawn lut lam aiin Mizoram atanga zin chhuakte hi an hlauhawm tawh zawk ang hiala ngaihtuah theih a ni a ti a, COVID-19 dona atana hmanraw mamawhte chatlak lova rawn phurh thlen zung zung a nih theih nan kar khata thlawhtheihna service zat tihpun a tul hle ni a ahriat thu a sawi a ni.

State Nodal Officer on COVID-19 Dr. Pachuau Lalmalsawma chuan sample test runpui nihnih neih chhung khan sample 10,002 test a nih thu leh positive 366 (3.66%) hmuh an nih tawh thu a sawi a, heng data te hi uluk taka ennawn leh a la tul tih a sawi a, hei bakah hian sample test zawng zawng srf ID pek a, COWIN portalah thun vek a ngaih avangin result kimchang tarlan hian hun a duh hlek thin tih sawiin, sample runpui test atana volunteers Data Entry Operator 25 leh Laboratory Technician 24 an rawihte chu Team 5 ah an then thu a sawi a, srf ID generate zung zunga result rang taka siam turin Data Entry Operator volunteer lakbelh an la mamawh dawn tih a sawi a ni.

Sample test runpui neih tan atangin vawiin thleng, nit hum chhung hian Veng/khua 12 – Armed Veng South, Bawngkawn, Bethlehem Vengthlang, Chhinga Veng, Electric Veng, ITI, Ramthar, Salem veng, Saron Veng, Tuirial, Venghlui leh Ch. Saprawnga truck terminal, rangvamuakahte sample test a ni tih sawiin, naktukah hian Baktawng Tlangnuam (Chhuanthar), Phunchawng, Rangvamual, Sairang leh Sihhmuiah sample test runpui hi neih leh tum a nih thu a sawi.

Vawiin meetingah hian mi 200 awm theihna ICFAI University CCC chu hman theih tura peihfel a nih thu tarlan niin, mi 300 dah theihna tur Falkland-a RAY building pawh Aizawl Mayor Pu Lalrinenga Sailo hovin Aizawl DC, P&E, PWD, PHED leh Health department ten a hmuna an enfiah tawh thu leh rang taka chei thata luah vat tura ruahmanna siam a nih thu tarlan a ni.

ZMC dinhmun pawh tarlan niin July ni 15 – 22 inkar hian ICU khum 34 awmnaah chawhrualin nitin mi 44 (attendant telin) an awm a, COVID Ward khum 273 awmah hemi hun chhung vek hian nitin damlo 305 (attendant telin) enkawl an ni a, chhuatah te an mut a ngaih thu tarlan a ni.

PM Cares hnuaia Owygen Plant 1000 lpm Central PWD in ZMC a an bun tur pawh kumin August ni 15 hmain peihfel a nih beisei thu tarlan niin, HLL inventilator 10 ZMC a an pek tur pawh a bun tur company engineer chu karleh lamah a rawn kal tur thu tarlan a ni bawk.