No.1516/2021-2022

Dated Champhai, the 22nd July, 2021: Tunhnaiah Zokhawthar khuaah hri kaina chin hriat loh Covid-19 hri kai hmuh chhuah an awm a, District Magistrate leh Chief Medical Officer, Champhaite an inrawn tlan hnuah helai chhehvelah natna hrik a darh zel loh nana hma lak nghal tul hle ni a hriat a ni. Mizoram Sawrkar-a Health & Family Welfare Department-in June 6, 2020-a 'Containment & Surveillance Plan on Covid-19 for Mizoram' a tih chhuah, para 4 tlawhchhanin helai bawr hi hri inkaidarh zel theihna, hmun ralti, mumal leh chak taka hnuchhui hna (contact tracing) kalpui ngaihna hmun ni a hriat a ni.

Thil awm dan hetiang hi a nih tak avang hian Pi Maria C.T Zuali, District Magistrate, Champhai District chuan, 'The Mizoram Epidemic Diseases (COVID-19) Regulations, 2020' Section 11 thuneihna a pek angin Zokhawthar khaw pumpui chu HMUN KHUAHKHIRH BIK (restricted area) ah vawiin July ni 22, 2021(Ningani) chawhnu hian a puang a ni.

Restricted area chhungah hian Magistrate, Medical Duty leh VLTF duty-te phalna lovin tu mah luh leh chhuah phal a ni lo. He inkhuahkhirhna hian Executive Magistrate, Police, Health & Family Welfare, Fire & Emergency leh State Bank of India, Zokhawthar Branch thawktute bakah, District Magistrate-in a bik taka phalna a pekte erawh a huam lo ang.

He thupek bawhchhia an awm a, man an nih chuan, 'The Mizoram Epidemic Diseases (Covid-19) Regulations 2020' Section 13 leh Indian Penal Code (IPC) Section 188 hmanga hrem theih an ni ang.

Hei hian thupek chhuah a nih atanga hnu chhuina (contact tracing) kalpui ngaih hun chhung a huam ang a, a tul anga pawhsei theih a ni ang.