No.2341/2021-2022

Aizawl, the 25th September, 2021: Vawiin khan Khawzawl DC Pu C.C. Lalchhuangkima chuan Khawzawla hmasawnna ruhrel thawh hrang hrangte a hmunah tlawhin hmalaknate a enfiah. DC hian Dinthar Veng-a DC Office Complex leh Project Director, DRDA Office hmun tur laih mekte bakah, Khawzawl Hermon Veng-a CMO Office tur laih mek leh District Hospital-a Oxygen Plant dah tura hmalakna kal mekte chu a hmunah a enfiah bawk.

Khawzawl District Bawrhsap Pu C.C. Lalchhuangkima chuan office sak hna thawktu contractor-te chu hunbi tiam chhunga hna zo hman tur leh, hna tha leh tlo, khawtlang leh ram tana rotling leh chhinchhiah tlak tak sa puitling turin a chah a. Mizoramah ruahsur hun chhung a rei avangin, khaw that lai chuha taima tak leh khawtlang thatna tur duhna rilru pu chunga thawk turin a fuih a. An hnathawh chu Khawzawl District pumpui tana hmasawnna ruhrel pawimawh tak a nih phak avangin a tawplamah hnawhsaruma thawh a ngaih loh nan a tir atanga tang taka thawk turin a chah a ni.

Khawzawl District DC Office Complex tur hi Khawzawl khawpui chhung laili lai, Dinthar vengah sak a ni dawn a. Pawisa sen tur zata ruahman hi cheng 10,00,00,000 (Cheng nuai sangkhat) niin, a dung feet 147, a vang feet 47 in chhawng li a sak tur a ni. Hnathawktute chuan a chhawng hnuaihnung pahnihte chu kum 2022 tawplamah luah theih tura peihfel hman a nih an beisei thu DC hi an hrilh a ni. Khawzawl Dintharah vek hian RD Department Office kianga Project Director, DRDA Office hmun tur laih mek pawh DC hian a tlawh nghal bawk.

Bawrhsap chuan District Hospital, Khawzawl Hermon Veng-a Pressure Swing Adsorption Plant (Oxygen Plant) bunfel tuma hmalakna kal mek pawh a hmunah tlawhin a enpui a. Tun dinhmunah oxygen plant bunna tur hmun hi District Hospital Compound-ah peihfel tawh niin, P&E Department nen tangrualin vawiin khan khawl tam zawk chu a awmna turah dahluh a ni a. Company mithiamte lo kal hunah bahlah lova PSA Plant hi bunfel a nih theih nan hmabak tihtur tul awmte chu DC kaihhruaina hnuaiah chak taka thawh mek a ni.

Khawzawl Hermon Veng-a Chief Medical Officer (CMO) office hmun tur laih mek pawh DC hian a hmunah tlawhin hnathawh mek a enpui a. CMO Office tur hi Lushai Engineer Consultancy ten thawkin, cheng vaibelchhe 3.346 sengin chhawng li-a sak tur a ni a. A hmun tur metre 58 a sei, metre 19 a zau a laih tawh chu Office mamawh tur hrang hrang ngaihtuahin company engineer-te nena enho leh tha tih a ni.

District Bawrhsapin Office hrang hrang sak mek leh oxygen plant bunna hmun tur a tlawhnaah hian Dr. Saithangpuia, BDO, Pu H. Lalramenga, SDC, Dr. Albert Lalhminghlua, Medical Officer in-charge District Hospital, khawtlang hruaitute leh Chanchinbumite an tel a ni.