No.2340/2021-2022

Aizawl the 24th September, 2021 : Food, Civil Supplies & Consumer Affairs, LAD leh Fisheries Department – te changtu Minister Pu K. Lalrinliana chuan vawiin khan a Department chan hnuaia Lunglei District-a hmun pawimawh  pathum – Fisheries Department hnuaia Government Fish Seed farm, Tawipui N II, Fish Seed Farm, Zobawk leh LAD hnuaia District Park Zobawk te a tlawh. Lunglei South bialtu MLA Dr K. Pachhunga, Supply leh LAD Department changtu Secretary Pu Zothanmawia, Supply Director Pi Ramdinliani, DLAO Pu James Miahlung, DFDO Pi Christina Lalramchhani, official dangte leh party hruaituten an tawiawm a ni.

Fisheries Minister chuan Government Fish Seed farm, Tawipui N II leh Fish Seed Farm, Zobawk dinhmun leh hmunhma te enfiahin a chei that dan tur leh hmalak tul te a hmunah a enfiah a. Government Fish Seed farm, Tawipui N II chu NEC kaltlangin kum 1988 ah khan bultan niin a chhungah sangha dil 12 a awm a. Kum 2008 atanga 2019 chhung khan ZOFISHFED kutah awmin tun dinhmunah a enkawl leh tih changtlun kawnga hmalak theih dan tur Fisheries Department thawktute chuan an buaipui mek a ni. Fisheries Department hnuaia sangha chi siam chhuahna hmun Fish Seed Farm, Zobawk hi kum 1981 ah bultan niin a chhungah sangha dil 13 a awm a. He Fish Seed Farm ah hian nikum khan Minister Pu K. Lalrinliana hmalaknain sangha tih keuna ‘Chinese Circular Hatchery’ chu cheng nuai 4.50 senga siam that niin he hatchery ah hian sangha hrang hrang chi siam chhuah (Breeding operation) hna kalpui chhoh mek a ni. Fish Seed Farm chu Fish farming ti hmasawn zel tur leh sangha tharchhuah lama kan intodelh theihna tura hmun pawimawh tak a ni tiin he farm ti changtlung zel tura hmalak chhunzawm zela ngaih pawimawh thu Fisheries Minister chuan a sawi a ni. Tawipui N II leh Zobawk ah te hian khawtlang hruaitute nen inkawmna hun hmangin an mamawhte leh hmasawn zelna tura ruahman tul te a sawipui a ni.

District Park Zobawk dinhmun leh hmunhma te enfiahin a chei that dan tur leh mipui tam zawk hipna tura hmalak dan tur te sawihovin ruahmanna a siam pui a ni. District Park, Zobawk chei that hna hi LAD chuan thawk mekin tun dinhmunah check dam,water reservoir, naupang infiamna hmunhma, playground PCC flooring leh gallery, swimming pool chei that, interlocking paver leh chequered tile phah hna te thawh zawh tawh niin hna dang hrang hrang kalpui mek a ni bawk.